Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 323 Hüküm no: 393 Orijinal metin no: [71a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Papa Yani v. Aleksi’nin mirasının kardeşinin oğlu Aleksandra ve onun kızı Afendirye’ye ait olduğu Havâss-ı Aliyye kazâsı müzâfâtından Kurfa nâm karye sâkinlerinden bundan akdem mürd olan Papa Yani (…) v. Aleksi nâm zimmînin li ebeveyn karındaşı oğlu Aleksandra’nın ve kızı Afendirye’nin husûs-ı âti’l-beyânı tasdîka vekîl olup vekâleti Mustafa Çavuş b. Abdullah ve İbrahim b. Abdullah şehâdetleri ile sâbite olan Aleksi v. Bekyar muvâcehesinde takrîr-i kelâm edip mezbûrun verâseti babam merkūm Aleksandra’ya ve mezbûre Afendirye’ye münhasıra oldukda karye-i mezbûrede vâki‘ olup bir tarafı Yorgi v. Bostancı mülküne ve bir tarafı Dökine v. Dimitri mülküne ve bir tarafı Kosta v. Dimitri mülküne ve bir tarafı tarîk-i âma müntehî olan menzili tansîf edip nısfı merkūmun ve nısf-ı âharı benim hisse-i şer‘iyye-i mevrûsum oldu dedikde mukırr-ı mezbûru ikrâr-ı meşrûhunda vekîl-i mezbûr bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olunup yed-i tâlibe def‘ olundu. Hurrire fi’l-yevmi’s-sâdis aşer min Recebi’l-ferd li sene tis‘a ve ışrîn ve elf. Şuhûdü’l-hâl: Yusuf Beşe b. Ali, İsmail Beşe b. Haydar, İbrahim b. Hasan, Mustafa b. Mehmed el-Muhzır, Kosta v. Dimitri, Todori v. İstemad, Vasil v. Yani.