İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 298 Hüküm no: 196 Orijinal metin no: [66a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Yusuf’un Mehmed Çelebi b. Davud’a olan borcunu ödemesi Mahmiye-i İstanbul’da Mesih Paşa mahallesi sükkânından işbu râfi‘ü’l-kitâb es-Seyyid Mehmed Çelebi b. es-Seyyid Davud meclis-i şer‘-i şerîf-i enverde sâbıkā altıncı sekbânların çorbacısı olan Mehmed Ağa b. Yusuf mahzarında üzerine da‘vâ ve takrîr-i kelâm edip bin yüz beş senesi Şevvali’l-mükerremi gurresinde hatt u hatmini hâvî işbu deyn temessükü nâtık olduğu üzere Mehmed Ağa’ya beş yüz yetmiş guruş ikrâz ve teslîm ol dahi iktirâz ve kabz ve kendi mesârifine sarfla istihlâk eyledikden sonra meblağ-ı mezbûru taleb eylediğimde bana edâdan imtinâ eder suâl olunup alıverilmesi matlûbumdur dedikde gıbbe’s-suâl mezbûr Mehmed Ağa cevâbında fi’l-hakīka kazıyye bâlâda tafsîl ve beyân olunan vech üzere olup müdde‘î-i mezbûr es-Seyyid Mehmed Çelebi’ye cihet-i karz-ı şer‘îden beş yüz yetmiş guruş el-ân zimmetimde lâzımü’l-edâ ve vâcibü’l-kazâ deynim vardır deyü bi tav‘ihî ikrâr ve i‘tirâf etmeğin alâ mûcib-i i‘tirafihî meblağ-ı mezbûr beş yüz guruşu müdde‘î-i mezbûra edâ ve îfâya mezbûr Mehmed Ağa’ya tenbîh olunup mâ hüve’l-vâki‘ bi’t-taleb ketb olundu. Fi’l-yevmi’s-sâmin min-şehr-i Şevvali’l-mükerrem li-sene seb‘a ve mie ve elf. Şuhûdü’l-hâl: İbrahim Efendi el-müderris, el-Hâc Mustafa b. Eyüb, İbrahim Çelebi b. Ahmed, Ali b. Bali, ve gayruhum mine’l-huzzâr