İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 301 Hüküm no: 198 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mustafa’nın kocası Hasan’dan muhâlaa yoluyla boşandığı Mahmiye-i İstanbul’da Ali Paşa-yı atîk mahallesi sâkinelerinden Fâtıma bt. Mustafa nâm hatun ba‘de’t-ta‘rîfi’ş-şer‘î meclis-i şer‘-i şerîf-i enverde zevc-i dâhili Hasan b. Abdullah tarafından husûs-ı âti’l-beyâna vekîl olduğu Osman b. Mustafa ve İvaz b. Abdullah nâm kimesneler şehâdetleriyle şer‘an sâbit ve sübût-ı vekâletine hükm-i şer‘î lâhık olan Hamza Efendi b. el-Hâc Maden mahzarında ikrâr ve takrîr-i kelâm edip zevcim mezbûr Hasan ile beynimizde hüsn-i zindegânemiz olmamağla zimmetinde mütekarrer ve ma‘kūdün aleyh olan altı bin akçe mehr-i mü’eccelim ve nafaka-i iddet-i mu‘ayyene-i ma‘lûmem üzerilerine ve me’ûnet-i süknâm dahi kendi üzerime olmak üzere mezbûr Hamza Efendi ile muhâla‘a-i sahîha-i şer‘iyye ile muhâla‘a olup ol dahi ber-vech-i muharrer hul‘-ı mezbûru kabûl etdiğinden sonra mezbûr Hasan bundan akdem beni mezbûrun firâşından hâsıla ve benden mütevellide sadriye-i sagīre kızım Ayşe’yi bilâ-nafaka bırakıp diyâr-ı âhara gitmekle işbu yedimde olan hüccet nâtıka olduğu üzere benim nafaka ve kisve ve sâir levâzım-ı zarûriyem içün mezbûr Hasan üzerine on akçe ve sagīre-i mezbûr[e] içün dahi beş akçe ki cem‘an on beş akçe kıbel-i şer‘den farz ve takdîr olundukdan sonra ber-mûceb-i hüccet mezbûrun zimmetinde on bin sekiz yüz akçe müctemi‘ olmağın bundan akdem taleb ve da‘vâ sadedinde olduğumda vekîl-i mezbûr benimle da‘vâ-yı mezkûremden ba‘de’n-nizâ‘ muslihûn tavassut edip iki bin yedi yüz akçeye sulh oldukda ben dahi sulh-i mezbûru kabûl ve bedel-i sulh olan meblağ-ı mezbûra ve sâir târih-i mezkûra gelince beynimizde cereyân eden husûsa müte‘allika âmme-i da‘vâdan mezbûr Hasan’ın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ışrîn min-Şevvali’l-mükerrem li-sene seb‘a ve mie ve elf. Şuhûdü’l-hâl: Şaban Efendi b. Nasuh, Mustafa Efendi b. İbrahim, İsmail Efendi b. ( ) Hüseyin Çelebi b. Mehmed, İmâm Mehmed Efendi, Mehmed b. ( ).