İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 302 Hüküm no: 200 Orijinal metin no: [67a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihal v. Dimo’nun menzilini oğlu Manok’a sattığı Mahmiye-i İstanbul’da Mirahur mahallesinde sâkine Tuhtâne bt. Onban? nâm nasrâniyenin oğlu tarafından husûs-ı âti’l-beyâna vekîl olduğu zâtını ârifân olan Marat b. Haçador ve Asador b. Mardiros nâm nasrânîler şehâdetleriyle sâbit olan Şahbaz b. Haçador nâm zimmî meclis-i kazâda işbu râfi‘u’s-sifr âhar oğlu Manok mahzarında bi’l-vekâle ikrâr ve takrîr-i kelâm edip vâlidem müvekkile-i merkūme mahalle-i merkūmede vâki‘ bir tarafdan Şâkire Hatun mülkü ve bir tarafdan Mihal v. Dimo nâm zimmî mülkü ve iki tarafdan tarîk-i âm ile mahdûd fevkānî bir oda ve bir sofa ve tahtânî iki oda ve cüneyne ve bir su kuyusunu müştemil mülk menzilini oğlu merkūm Manok’a tarafeynden îcâb ve kabûlü hâvî bey‘-i kat‘î ile üç yüz guruşa bey‘ ve teslîm ol dahi ber-vech-i muharrer iştirâ ve tesellüm etdiğinden sonra semeni olan meblağ-ı merkūm üç yüz guruşu merkūm Manok’dan tamamen ahz u kabz eyledi ba‘de’l-yevm menzil-i mezkûr merkūm Manok’un mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’l-mer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis aşar min-Şevvali’l-mükerrem li-sene seb‘a ve mie ve elf. Şuhûdü’l-hâl: Ahmed Ağa b. Hüseyin, Ahmed b. Muslu, Nasuh b. Receb, el-Hâc Şaban câbî, Ahmed Çelebi b. Mehmed