İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 303 Hüküm no: 201 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Sâliha bt. Abdullah’ın kızı Fâtıma ile oğlu Süleyman arasındaki miras anlaşmazlığının halli Mahmiye-i İstanbul’da Çivizâde mahallesinde sâkine iken bundan akdem vefât eden Sâliha bt. Abdullah nâm hatunun verâseti sadrî kebîr oğlu Süleyman ile sadriye kebîre kızı Fâtıma nâm hatuna münhasıra olduğu şer‘an zâhir ve mütehakkık oldukdan sonra mezbûr Süleyman meclis-i şer‘-i şerîf-i enverde mezbûre Fâtıma mahzarında ikrâr-ı tâm ve takrîr-i kelâm edip karındaşım mezbûre Fâtıma vâlidemiz müteveffât-ı mezbûrenin terekesinden mecmû‘ yirmi guruş kıymetli üç köhne sandal kaftân ve bir teyn kürkü ve üç minder ve dört yemenî yorgan ve dört yastık gılâfı ve iki yastık ve yedi sagīr sahan ve üç tancere ve elli dirhem bir sîm kuşak dokuz ayaklı bir çift inci küpe ve bir kebîr tebsi ve iki döşek ve bir şam‘dân müstakillen ahz u kabz etmekle bundan akdem eşyâ-i mezbûreden bana isâbet eden hisse-i irsiye-i mu‘ayyenemi taleb ve da‘vâ etdiğimde ol dahi cevâbında eşyâ-i muharrer-i mezkûremi vâlidemden sonra müteveffâ olan babam Ahmed nâm kimesne hâl-i hayatında bana cihâz olmak üzerine teslîm ben dahi meclis-i hîbede ittihâb ve kabz edip mülk-i mevhûbem olmak üzere vaz‘-ı yed ederim deyücek beynimizde nizâ‘-ı küllî vukū‘ından sonra muslihûn tavassut edip mezbûre Fâtıma da‘vâ-yı mezkûremden benimle an inkâr beş guruş üzerine sulh oldukda ben dahi sulh-i mezbûru kabûl ve bedel-i sulh olan meblağ-ı mezbûr beş guruşu mezbûre Fâtıma Hatun yedinden bi’t-tamam ahz u kabz edip ba‘de’l-yevm vâlidem mezbûre Sâliha’nın terekesinden ve babam mezbûrun terekesinden bana isâbet eden hisse-i irsiyeme müte‘allika âmme-i da‘vâdan mezbûre Fatma’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis min-Şevvali’l-mükerrem li-sene seb‘a ve mie ve elf Şuhûdü’l-hâl: İbrahim Çelebi b. Ahmed, Ali b. Mustafa , İbrahim Çelebi b. Mehmed, Ali b. Bali, Ahmed b. Ahmed, ( ) b. Şabân