İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 304 Hüküm no: 202 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani bt. Abdullah’ın sahibi olduğu evi kocası Abdurrahman Ağa b. Musa’ya sattığı Husûs-ı âti’l-beyânın mahâllinde tenmîki iltimâs olunmağın savb-ı şer‘-i enverden Mevlânâ Resmî Osman Efendi irsâl olunub ol dahi mahmiye-i İstanbul’da Hacı Küçük mahallesi sükkânından el-Hâc Abdurrahman Ağa b. Mûsa’nın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i Nebevî eylediğinde mezbûr el-Hâc Abdurrahman Ağa’nın zevce-i menkûhası fahrü’l-muhadderât Sarayî? Ümmühani bt. Abdullah nâm hatun zât-ı zevci mezbûr Hacı Abdurrahman Ağa b. Musa ve Mehmed Çelebi b. İdris ta‘rîfleriyle mu‘arrefe oldukdan sonra meclis-i ma‘kūd-ı mezbûrda işbu kitâb-ı sıhhat-nisâbın sahibi umdetü’l-müderrisîni’l-kirâm zübdetü’l-müdakkikīni’l-fihâm el-Hâc Mehmed Efendi b. Eyüb mahzarında ikrâr ve takrîr-i kelâm edip ve akd-i âtî sudûruna değin yedimde mülk ve hakkım olup mahmiye-i mahkiyede Tevkī‘-[i] Cafer Çelebi mahallesinde vâki‘ iki tarafdan Halıcızâde Hatunu mülkü ve bir tarafdan Kürkçü Timyonos nâm zimmî mülkü ve bir tarafdan tarîk-i âm ile mahdûd ve mümtâz olup dâhiliyesi fevkānî dört bâb oda ve bir sofa ve bir tahta-pûş ve tahtânî bir kiler ve bir matbah ve bir hamam ve bir mahzen ve su kuyusu ve kenîf ve havlu ve hâriciyesi üç bâb fevkānî oda ve bir sofa ve ahır ve fevkinde iki oda ve bir samanlık ve bir arpa ambarı ve bir kenîf ve bir kebîr musluğu muhtevî mülk menzilimi bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile mûmâ-ileyh el-Hâc Mehmed Efendi’ye sekiz yüz guruşa bey‘ ve temlîk ve teslîmve müşârun-ileyh el-Hâc Mehmed Efendi dahi ber-vech-i meşrûh iştirâ ve temellük ve kabûl ve tesellüm ve kabz eylediğinden sonra semeni olan meblağ-ı mezbûr sekiz yüz guruşu müşârun-ileyh Mehmed Efendi yedinden işbu meclis-i ma‘kūdda bi’t-tamam ahz u kabz eyledim ba‘de’l-yevm menzil-i mahdûd-ı mezbûrda bi-vech [vechen] mine’l-vücûhi’ş-şer‘iyye benim kat‘â alâkam ve medhalim kalmayıp müşârun-ileyh el-Hâc Mehmed Efendi’nin [mülk-i] müşterâsı ve hakk-ı sırfı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î husûs-ı mezbûru mevlânâ-yı mezbûr mahâllinde tahrîr ve ba‘dehû savb-ı şerî‘at-i garrâdan ba‘s olunan Süleyman Çelebi b. Abdullah ve İsmail Çelebi b. Mehmed ile meclis-i şer‘a gelip alâ vukū‘ıhî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâmin (…) min-Şevvali’l-mükerrem li-sene seb‘a ve mie ve elf. [68a] Şuhûdü’l-hâl: Fahrü’l-kuzât İsmail Efendi b. Mehmed, İbrahim Efendi b. Mehmed Efendi, Muhyiddin Efendi b. Abdurrahman, Muharrem Efendi b. İvaz Efendi Bursevî, Ali Efendi b. el-Hâc Abdülkerim Efendi, Ahmed Efendi b. Mehmed, Ahmed Efendi b. Hüseyin, el-Hâc Osman b. Abdullah, el-Hâc Ali b. Abdullah, Yahya Efendi b. Ahmed Efendi, el-Hâc Osman Sofcı, Mehmed Çelebi b. Abdi, Hüseyin Çelebi b. Mehmed, Ali Efendi b. Pir Mehmed Efendi, el-Hâc Abdi b. Mahmud, ve gayruhum mine’l-huzzâr