İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 191 Hüküm no: 190 Orijinal metin no: [25a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebûbekir b. Süleyman ile Çukadâr Derviş İlyas b. Yusuf’un alacak davasında bir birlerinin zimmetini ibra ettikleri Kat‘-ı nizâ‘ Ma‘rûz Şekerci esnâfından sâhib-i arzuhâl Ebûbekir b. Süleyman meclis-i şer‘-i münîrde arzuhâlde mezkûr Çukadâr Derviş İlyas b. Yusuf mahzarında bin iki yüz on iki senesi hilâlinde merkūm İlyas’tan iktirâz ve kabz eylediğim yüz doksan beş guruşun bilâ-devr ribhi olarak işbu târih-i i‘lâmı şehr-i Zilka‘deti’ş-şerîfesi gurresine gelince beher mâh beşer guruşdan elli dört ayda medfû‘um olan iki yüz yetmiş yedi guruşun yüz doksan beş guruşu deyn-i mezkûruma ba‘de’t-takās bâkīsi olan seksen iki guruş ile yedimden iştirâ ve kabz eylediği şeker semeninden dahi üç guruş on yedi parayı taleb ederim deyü da‘vâ eylediğimde ol dahi cevâbında ben malımdan sana iki yüz elli guruş karz verip meblağ-ı mezkûrun beş guruşunu nakden ve üç guruş on yedi parasını şeker semeninden istîfâ etmemle bâkīsi olan iki yüz kırk bir guruş yirmi üç parayı taleb ederim deyü benden da‘vâ ve bilâ-devr ol mikdar guruş benden ribh aldığını inkâr etmekle beynimizde ba‘de vukū‘ı’l-münâza‘a bâ-tavassut-ı muslihîn ben tasaddî eylediğim cem‘an seksen beş guruş on yedi para da‘vâmdan ve merkūm İlyas iki yüz kırk bir guruş yirmi üç para da‘vâsından fâriğler olup zikr olunan husûslara müte‘allika âmme-i da‘vâdan her birimiz âharın zimmetini ibrâ-yı âmm ile ibrâ ve iskāt ve her birimiz ber-vech-i muharrer âharın ibrâsını kabûl eyledik deyü ba‘de’l-ikrâr ve’t-tasdîk bu vechile kat‘-ı nizâ‘ eyledikleri İslâmbol Mahkemesi’nden huzûr-ı âlîlerine i‘lâm olundu. Fî-23 min Za sene [1]216