İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 192 Hüküm no: 191 Orijinal metin no: [25a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abraham v. Avadek’in, Kapril v. Minas aleyhine açtığı alacak davasını ispat edemediğinden muarazadan men edildiği Kapril zimmînin mu‘ârazadan men‘ i‘lâmıdır. Ma‘rûz Tersâne-i Âmire’de hortum dikicisi olan Abraham v. Avadek zimmî meclis-i şer‘-i münîrde kefereye mahsûs mest dikici ustalarından Kapril v. Minas zimmî muvâcehesinde ben bundan akdem kırmızı mest dikicisi esnâfından olmamla mersûm Kapril zimmî mehd-i ulyâ İsmetli Vâlide Sultan hazretlerinin vakfı olan hânda bana destgâh mahalli vermek üzere bin iki yüz on dört senesi Muharreminin on beşinci günü malımdan yüzlük olarak bir def‘a beş yüz guruş ve bir def‘a dahi kırk iki aded ikilik ve kırk para ki cem‘an beş yüz seksen beş guruş bi-tarîkı’r-rüşve vermemle meblağ-ı mezkûru hâlâ istirdâd ederim deyü ba‘de’d-da‘vâ ve’l-istintak ve’l-inkâr müdde‘î-i mersûm ber-vech-i muharrer müdde‘âsını beyân için ba‘de’l-istimhâl ve’l-imhâl müddet-i mehl-i şer‘î mürûr ve ityân-ı beyyineden ızhâr-ı acz ve istihlâf ettikde mersûm Kapril zimmîye vech-i şer‘î üzere yemîn verilmeğin mûcebiyle müdde‘î-i mesfûr Abraham zimmî da‘vâ-yı mezkûresiyle mersûm Kapril zimmîye bilâ-beyyine mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî-19 min-Zilka‘de sene [1]216