İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 192 Hüküm no: 192 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vekilharç Abdullah’ın vârisi Mükerrem bt. Abdullah’ın, Sarraf Yako v. İsak ile iki yüz guruşa sulh olduğu 200 guruşa sulh Ma‘rûz Sâbıkā medîne-i Yenişehir Fener nâibi Cezbî Hasan Efendi’nin vekîlharclık hizmetinde iken medîne-i mezbûrede vefât eden el-Hâc Abdullah b. Abdullah’ın verâseti zevcesi Mükerrem bt. Abdullah ile sulbî sagīr oğlu Mehmed Emin’e ba‘de’l-inhisâr zâtı ta‘rîf-i şer‘î ile mu‘arrefe olan sâhibe-i arzuhâl zevce-i mezbûre Mükerreme kendi nefsinden asâleten ve oğlu sagīr-i mezbûr Mehmed Emin’in kıbel-i şer‘den mansûbe vasîsi olmağla vesâyeten meclis-i şer‘-i münîrde medîne-i mezbûre reayâsından arzuhâlde mastûr Sarraf Yako v. İsak Yahûdi muvâcehesinde zevcim ve mûrisimiz müteveffâ-i merkūm hayatında bin iki yüz on beş senesi Ramazani’l-mübâreğinin yirmi beşinci günü malından mesfûr Yako Yahûdi’ye beş yüz otuz guruş ikrâz ve teslîm ol dahi iktirâz ve kabz eylediğinden sonra meblağ-ı mezkûru İslâmbol’da şerîki ( ) Yahûdi’den olmak üzere yedine bir kıt‘a poliçe temessükü i‘tâ edip lâkin meblağ-ı mezkûru kable’l-ahz ve’l-istîfâ üç gün mürûrunda zevcim merkūm fevt ve meblağ-ı mezkûr benimle vasîsi olduğum sagīr-i mezbûra hasran mevrûs olmağla meblağ-ı mezkûru bi’l-asâle ve bi’l-vesâye taleb ederim deyü da‘vâ eylediğimde ol dahi cevâbında meblağ-ı mezkûr beş yüz otuz guruşu şerîkim mersûm sana edâ ve teslîm ve poliçe temessükünü ahz etmişdi deyü beni def‘a tasaddî ve def‘-i mezkûrunu isbât edeceği meczûmum ve sulh sagīr-i mezbûr hakkında evlâ ve enfâ‘ olduğuna binâen ben ber-vech-i muharrer tasaddî eylediğim da‘vâmdan mersûm Yako Yahûdi ile iki yüz guruşa bi’l-asâle ve bi’l-vesâye sulh olduğumda ol dahi sulh-i mezkûru ba‘de’l-kabûl bedel-i sulhden mâ‘adâ ziyâde müdde‘âma müte‘allika da‘vâdan mersûm Yako Yahûdi’nin zimmetini kabûlü hâvi ibrâ ve iskāt eyledim fîmâ ba‘d husûs-ı mezkûra müte‘allika mersûm Yako Yahûdi ile bi’l-asâle ve bi’l-vesâye da‘vâ ve nizâ‘ ve husûmetim kalmadı deyü ba‘de’l-ikrâr ve’t-tasdîk bedel-i sulh-i mezkûr iki yüz guruşu müdde‘iye-i mezbûreye edâ ve teslîme mersûm Yako Yahûdi’ye tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-27 min Za sene [1]216