İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 193 Hüküm no: 193 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Fâtıma Hatun’un, cariye zenciye Halime’yi eski kocası Yusuf Ağa b. Ahmed’e teslim etmesi gerektiği Câriye teslîmine tenbîh Ma‘rûz Sâhib-i arzuhâl Yusuf Ağa b. Ahmed meclis-i şer‘-i münîrde sâbıkā zevcesi arzuhâlde mezkûre Şerîfe Fâtıma nâm Hatun’un babası ve tarafından husûs-ı âti’l-beyânda vekâleti zâtını ârifân İmâm Hasan Efendi b. Yahya ve Mustafa Ağa b. Ahmed şehâdetleriyle sâbit olan el-Hâc Mehmed Sâdık Efendi b. İbrahim mahzarında yedimde câriye-i memlûkem zenciye Halime’yi zevcem müvekkile-i mezbûre fuzûlî ahz etmekle bana teslîme tenbîh olunmak matlûbumdur deyü da‘vâ ettikde vekîl-i merkūm dahi cevâbında câriye-i mezbûre kızı ve müvekkilesi merkūme Şerîfe Fâtıma’nın hâlâ yedinde olduğunu ikrâr lâkin müdde‘î-i mezbûr câriye-i mezkûreyi zevciyet beynlerinde kāime iken kızım ve müvekkilem mezbûreye hibe ve teslîm ol dahi meclis-i hibede kabz ve kabûl etmişdi deyü ba‘de’d-def‘ ve’l-inkâr dâfi‘-i merkūm ber-vech-i muharrer def‘ini isbâtdan ızhâr-ı acz ve istihlâf etmekle mezbûr Yusuf Ağa gıbbe’t-tahlîfü’ş-şer‘î mûcebince dâfi‘-i vekîl-i merkūm def‘-i mezkûruyla bilâ-beyyine mu‘ârazadan ba‘de’l-men‘ ikrâr u i‘tirâfı mûcebince câriye-i mezkûreyi müdde‘î-i merkūm Yusuf Ağa’ya teslîme müvekkile-i mezbûre için vekîl-i merkūm el-Hâc Mehmed Sâdık Efendi’ye tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-27 min-Zilka‘de sene [1]216