İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 194 Hüküm no: 194 Orijinal metin no: [25b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise bt. Abdullah’ın, Bakkal Dimitri v. Bolinçeron ile bakkal satışı davasında sulh oldukları 425 guruşa sulh bakkāl mübâya‘ası Ma‘rûz Sâhibe-i arzuhâl mu‘arrefetü’z-zât Nefise bt. el-Hâc Abdullah nâm Hatun meclis-i şer‘-i münîrde arzuhâlde mastûr Bakkāl Dimitri v. Bolinçeron zimmî muvâcehesinde mahrûse-i Galata’da voyvoda konağı kurbünde vâki‘ Hacı Mustafa dükkânı demekle ma‘rûf bir bâb bakkāl dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûme yüz yirmi sehm i‘tibâriyle altmış sehmi benim yedimde mülküm olmağla zikr olunan altmış sehmin otuz sehmini yedimde ibkā ve otuz sehmini dahi mersûm Dimitri zimmîye semen-i ma‘lûme bey‘ ve teslîm ve mülkümde olan otuz sehmi dahi senevî ellişer guruşa mesfûra îcâr ol dahi ba‘de’l-istîcâr ol sene müstakillen zabt ve tasarruf eylediğinden sonra zikr olunan otuz sehmi dahi yeni mersûma bey‘ ve teslîm etmişdim el-hâletü hâzihi müddet-i mezkûrede îcâreden zimmetinde müctemi‘a olan beş yüz guruşu bana vermemekle taleb ederim deyü tasaddî eylediğim da‘vâmdan bâ-tavassut-ı muslihîn mesfûr Dimitri zimmî ile kat‘an li’n-nizâ‘ dört yüz yirmi beş guruşa sulh olduğumda ol dahi sulh-ı mezkûru kabûl ve bedel-i sulh olan dört yüz yirmi beş guruşu mersûm Dimitri işbu meclis-i şer‘de bana def‘ ve teslîm ben dahi yedinden tamamen ba‘de’l-kabz ziyâde müdde‘âma ve bi’l-cümle âlât-ı mezkûreye ve işbu târih-i i‘lâma gelince bi’l-cümle sâir hukūk-ı şer‘iyyeye müte‘allika âmme-i de‘âvî ve kâffe-i mütâlebâtdan mersûm Dimitri zimmînin zimmetini ibrâ-yı âmm-ı sahîh-i şer‘î ile ibrâ ve iskāt eylediğimde ol dahi ber-vech-i muharrer ibrâmı kabûl eyledi deyü ba‘de’l-ikrâr ve’t-tasdîk bu vechile külliyen kat‘-ı nizâ‘ eyledikleri İslâmbol Mahkemesi’nden huzûr-ı âlîlerine i‘lâm olundu. Fi’l-yevmi’s-sâbi‘ ve’l-ışrîn min-Zilka‘deti’ş-şerîfe li-sene sitte aşara ve mi’eteyn ve elf.