İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 195 Hüküm no: 195 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvân Yorgi v. Yozvan’ın, Molkona bt. Nesim’e olan borcunu tecil ettiği Bahçıvân sulh ve te’cîli Ma‘rûz Havâss-ı Refî‘a kazâsına muzâfe Hasköy kasabası mütemekkinelerinden arzuhâl eden mu‘rrefetü’ş-şahs Malkona bt. Nesim nâm Yahûdi’ye meclis-i şer‘-i münîrde arzuhâlde mastûr Bahçıvân Yorgi v. Yozvan zimmî muvâcehesinde mersûm Yorgi zimmî bundan akdem yedimden ve malımdan iktirâz ve kabz eylediği sekiz yüz guruş deyni mukābelesinde kasaba-i mezbûre mahkemesi ittisâlinde vâki‘ bir bâb bostan derûnunda mevcûde beyne’l-esnâf gedik tâ‘bir olunan âlât-ı lâzıme-i ma‘lûmeyi bâ-hüccet vefâen bana bey‘ ve teslîm eylediğinden sonra zikr olunan gedik âlâtını benim iznim olmaksızın tarafndan tevkîl eylediği müderrisîn-i kirâmdan Derviş Mustafa Efendi işbu hâzırân bi’l-meclis Anton ve karındaşı Petro veledey Nikola zimmîlere yedi yüz yirmi guruşa bey‘ eylediğinden sonra vekîlim merkūm zikr olunan gedik âlâtını semen-i mislinden noksana fâhiş (…) ile bey‘ etmişidi deyü mersûmândan da‘vâ ve da‘vâ-yı mezkûresinden mesfûrân Anton ve Petro zimmîler ile üç yüz guruşa sulh olup husûs-ı mezkûra müte‘allika da‘vâdan mesfûrânın zimmetlerini ibrâ ve iskāt eyledikde onlar dahi sulh ve ibrâsını kabûl edip ve ben ber-vech-i muharrer bey‘i mücîze olmamla meblağ-ı mezkûr sekiz yüz guruşu mersûm Yorgi zimmîden hâlâ taleb ederim deyü tasaddî eylediğim da‘vâmdan mersûm Yorgi zimmî ile an ikrâr üç yüz seksen guruşa sulh olduğumda ol dahi sulh-i mezkûru ba‘de’l-kabûl ba‘del-i sulh-ı mezkûr üç yüz seksen guruşdan mâ‘adâ ziyâde müdde‘âma müte‘allika âmme-i da‘vâdan ben mersûm Yorgi zimmînin zimmetini kabûlü hâvi ibrâ ve iskāt eylediğimden sonra bedel-i sulh-i mezkûrun üç yüz guruşunu hâzırân-ı mesfûrânda bedel-i sulhten alacağından havâle ve her birimiz havâle-i mezkûreyi kabûl eylediğimizden sonra mesfûrân Anton ve Petro havâle olunan üç yüz guruşun yüz guruşu bana edâ ve teslîm ve bâkī iki yüz guruşunu altmış bir gün tamamında edâ etmek üzere istimhâl eylediklerinde ben dahi imhâl ve te’cîl eyledim deyü mukırra-i mersûmenin bi’l-cümle takrîr-i meşrûhunu mersûm Yorgi ve hâzırân-ı mesfûrân Anton ve Petro zimmîlerden her biri tasdîk etmeleriyle bedel-i sulhten bâkī seksen guruşu mersûm Yorgi zimmî hâlâ ve meblağ-ı mezkûr üç yüz guruşdan bâkī iki yüz guruşu ecel-i merkūm hulûlünde mesfûrân Anton ve Petro zimmîler bi-hükmi’l-havâle mersûme Malkona Yahûdiye’ye edâ ve teslîme her biri ta‘ahhüd eyledikleri İslâmbol Mahkemesi’nden huzûr-ı âlîlerine i‘lâm olundu. Fî-27 min-Zilka‘de sene 1216