İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 196 Hüküm no: 196 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime bt. Mehmed’in, Mehmed Emin b. Halil’den muhâla‘a yoluyla boşandığı Muhâla‘a Ma‘rûz Sâhibe-i arzuhâl mu‘arrefetü’z-zât Rahime bt. Mehmed nâm Hatun Çarşamba günü arz odasında huzûr-ı âlîlerinde ma‘kūd meclis-i şer‘-i münîrde zevc-i muhâlı‘ı arzuhâlde mezkûr Sabuncu Mehmed Emin b. el-Hâc Halil mahzarında merkūm Mehmed Emin zevc-i dâhilim olup lâkin beynimizde hüsn-i mu‘âşeretimiz olmamağla iki def‘ada zimmetinde mütekarrir ve ma‘kūdun aleyh olan beş yüz guruş mehr-i müeccelim ile nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim merkūm ile muhâla‘a-i sahîha-i şer‘iyye ile hul‘ olduğumda ol dahi hul‘-ı mezkûru ba‘de’l-kabûl hukūk-ı zevciyete ve zevcim merkūmdan bâ-defter-i müfredât mütâlebe eylediğim eşyâ-i ma‘lûmeye ve işbu târih-i i‘lâma gelince bi’l-cümle sâir hukūk-ı şer‘iyyeye müte‘allika âmme-i de‘âvî ve kâffe-i mütâlebâtdan ben zevcim merkūmun zimmetini ibrâ-yı âmm ile ibrâ ve iskāt eylediğimde ol dahi ancak hukūk-ı zevciyete müte‘allika da‘vâdan benim zimmetimi ibrâ ve iskāt ve her birimiz ber-vech-i muharrer âharın ibrâsını kabûl eyledik deyü takrîrini merkūm Mehmed Emin tasdîk eylediği tescîl ve İslâmbol Mahkemesi’nden huzûr-ı âlîlerine i‘lâm olundu. Fî-26 min-Zilka‘de sene [1]216