İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 196 Hüküm no: 197 Orijinal metin no: [26a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yedikule’deki şerbethanenin kapatılması gerektiği Yedikule’de şerbethâne sedd u bendi Ma‘rûz İslâmbol’da Yedikulekapısı hâricinde mumcular esnâfının kethüdâsı Ömer Ağa b. Mustafa ve Yiğitbaşı Ebûbekir Usta ve esnâf-ı mezkûre ustalarından diğer Ebûbekir ve İsmail ve Mustafa ve İsa ve İslâm ve Hüseyin ve Ali ve Selim ve Ahmed ve Muhtar ve diğer İsmail ve Hasan ve diğer Ebûbekir ve Abdülkādir ve Kahveci İsmail ve Bacacı diğer İsmail nâm kimesneler meclis-i şer‘-i münîrde takrîr-i kelâm edip mârru’z--zikr Yedikule hâricinde kâin kârgîr hânın karşısında vâki‘ bozahâne derûnunda müstecir olan zimmî şerbethâne ittihâz ve bey‘ etmekle mürûr ve ubûr eden mechûlü’l-ahvâl kimesneler duhûl ve fesâda ictisâr eylediklerini bundan akdem izzetlü sekbanbaşı ağaya ifâde eylediğimizde ol dahi def‘-i fesâd için şerbethâne-i mezkûreyi sed ve men‘ ve zimmî-i mesfûru tard etmişken bu esnâda mutasarrıfı Bostanî İbrahim şerbethâneyi ke’l-evvel küşâd irâdesinde olup küşâd olunduğu sûretde cümlemizin emniyet ve rahatı külliyen meslûb olacağı zâhir ve âşikâr olmağla men‘ ü def‘ buyrulmak matlûbumuzdur deyü istid‘â-yı inâyet etmeleriyle belde-i İslâmiye’de bu misillü fesâdâtın men‘ ü def‘i umûr-ı vâcibeden olmağla fîmâ ba‘d şerbethâne-i mezkûre küşâd olmamak üzere izzetlü sekbanbaşı ve izzetlü bostancıbaşı ağalar bendelerine hitâben emr-i âlîleri sudûru mesûbât-ı celîleden olduğu İslâmbol Mahkemesi’nden huzûr-ı âlîlerine i‘lâm olundu. Fî-27 min-Zilka‘de sene [1]216