İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 197 Hüküm no: 200 Orijinal metin no: [26b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seferikoz Mahallesi’ndeki avârız vakfının ebniye arsasına, Ahizâde Yusuf Efendi cami-i şerifi vakfı tarafından müdahale edilmemesi için mütevellî Seyyid Hafız İsmail Efendi’ye tenbih edildiği Ma‘rûz Zikri âti husûsun mahallinde bi’l-mu‘âyene istimâ‘ ve fasl u hasmı için cânib-i şer‘den irsâl olunan kâtib-i sâni Merhabâzâde Mahmud Efendi İstanbul’da Cebeali kapısı dâhilinde Seferikoz Mahallesi’nde vâki‘ münâza‘un fîh olan menzile varıp hâssa mimarı hulefâlarından Mehmed Emin ve diğer Mehmed vesâir mazbûtü’l-esâmî Müslimîn huzûrlarında akd-i meclis-i şer‘-i kavîm eyledikde nezâret-i dâ‘îlerinde olan evkāfdan zikr olunan Seferikoz Mahallesi Avârızı Vakfı’nın mütevellîsi es-Seyyid Mustafa Ağa b. es-Seyyid Hasan meclis-i ma‘kūd-ı mezkûrda yine nezâret-i dâ‘îlerinde âsûde Ahizâde Yusuf Efendi Câmi‘-i şerîfi vakfının mütevellîsi es-Seyyid el-Hâc Hâfız İsmail Efendi b. el-Hâc Halil mahzarında menzil-i mezbûra Ahizâde Yusuf Efendi Vakfı müstagallâtından olmak üzere mutasarrıfe olan Âişe bt. Mehmed nâm Hatun hâzıra olduğu hâlde işbu derûnunda akdi meclis-i şer‘ olunan bir tarafdan Ahizâde vakfından Aşçı Ömer tasarrufunda olan menzil ve bir tarafdan Odunyarıcı Memiş menzili ve bir tarafdan Ahizâde Yusuf Efendi ve avârız vakıflarından Kâmile Hatun tasarrufunda olan menzil ve taraf-ı râbi‘i tarîk-i has ile mahdûd bir bâb menzilin sâlifü’z-zikr tarîk-i has ve mezbûre Kâmile Hatun ve Aşçı Ömer menzilleri cânibinden mimârân-ı mezkûrân mesâhaları tûlen altı zirâ‘ yirmi bir parmak ve arzan üç zirâ‘ altı parmak terbî‘an yirmi iki zirâ‘ sekiz parmak arsa ve ebniyesiyle tarîk-i has havası üzerinde kâin tûlen altı zirâ‘ yirmi bir parmak ve arzan iki buçuk zirâ‘ ebniyesi Ahizâde Yusuf Efendi vakfı müstegillâtından olup mâ‘adâ zikr olunan mezbûr Aşçı Ömer ve Odunyarıcı Memiş ve Kâmile Hatun menzilleri cânibinden tûlen altı zirâ‘ on sekiz parmak ve arzan beş buçuk zirâ‘ terbî‘an otuz yedi zirâ‘ üç parmak arsa ve ebniyesi mütevellîsi olduğum avârız vakfı müstagallâtından olmağla Ketânî Hüseyin b. Abdullah tasarrufunda iken bilâ-veled fevt ve mahâll-i mezkûr mahlûl ve cânib-i vakf-ı mezkûra âid olmuşken mahâll-i mezkûru mütevellî-i mezbûr Ahizâde Yusuf Efendi vakfı müstegillâtından olmak üzere fuzûlî zabt ve hâzıra-i mezbûre Âişe Hatun’a îcâr etmekle kasr-ı yedine tenbîh olunmak matlûbumdur deyü ba‘de’d-da‘vâ ve’l-istintak ve’l-inkâr müdde‘î mütevellî-i mezbûr es-Seyyid Mustafa ber-vech-i muharrer müdde‘âsını udûlden olup şehâdetleri makbûle olan mahalle-i mezbûre İmâmı es-Seyyid Mustafa Efendi b. el-Hâc es-Seyyid Mehmed Emin ve ahâlîsinden Mehmed Ağa b. İbrahim ve es-Seyyid el-Hâc Hasan Ağa b. Mehmed ve Kazgancıbaşı İsmail Ağa b. el-Hâc Süleyman ve es-Seyyid Osman Ağa b. Mustafa ve Abdurrahman Ağa b. Resul ve Mehmed Ağa b. Mustafa ve diğer Mehmed Emin b. el-Hâc İsmail ve İsmail Ağa b. Abdullah ve es-Seyyid Ömer Ağa b. es-Seyyid el-Hâc Hasan ve Veliyüddin b. Musa nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince mahâll-i mezkûrun ebniye ve arsasından keff-i yedine mütevellî-i mezbûr es-Seyyid el-Hâc Hâfız İsmail Efendi’ye tenbîh eylediğini mevlânâ-yı mezbûr mahallinde ketb ve tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihi inhâ ve takrîr eylediği İstanbul Mahkemesi’nden huzûr-ı âlîlerine i‘lâm olundu. Fî-21 min-Zilka‘de sene [1]216