İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 199 Hüküm no: 201 Orijinal metin no: [26b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Ağa b. Mustafa’nın, debbâğ esnafından Ahi Baba Abdullah Ağa ve diğerleriyle altı bin guruşa sulh oldukları Ahi Baba ile debbâğ esnâfı 6.000 guruşa sulh Ma‘rûz Medîne-i Üsküdar’da vâki‘ debbâğ esnâfından Ahi Baba Abdullah Ağa b. el-Hâc Osman ve Kethüdâ Mustafa Ağa b. el-Hâc Osman ve Yiğitbaşıları Osman b. Hüseyin ve ustalarından sâhib-i arzuhâl es-Seyyid Ahmed Ağa b. el-Hâc Mehmed Emin ve Mehmed Ağa b. Osman ve İbrahim b. el-Hâc Süleyman ve Ali Efendi b. el-Hâc Mehmed ve es-Seyyid Yakub b. İshak ve el-Hâc Ahmed b. Ali ve Abbas b. el-Hâc Abdullah ve el-Hâc Ali b. Ebûbekir ve es-Seyyid Mustafa b. Hüseyin ve es-Seyyid Mehmed Tahir ve Ömer b. es-Seyyid Osman ve el-Hâc Mehmed Emin b. Ahmed ve Yusuf b. Ahmed ve Süleyman b. Mehmed nâm kimesneler meclis-i şer‘-i münîrde mukaddemâ Ahi Babaları olan arzuhâlde mezkûr el-Hâc Mahmud Ağa b. el-Hâc Mustafa mahzarında mezbûr el-Hâc Mahmud bundan akdem ahi baba olduğu bin iki yüz on üç senesi Saferi’l-hayrından işbu târih-i i‘lâm senesi Şevvâli’l-mükerremi gāyetine gelince ahz u i‘tâsının hesâbını esnâfımızdan Yedikule ustalarından Süleyman Ağa ve Hacı Lütfullah ve Kasımpaşa ahi babası Ahmed Efendi ve yiğitbaşısı el-Hâc Ahmed ve Hacı Alizâde el-Hâc Mehmed Ağa ve Eyüb Ahi babası Ebûbekir Ağa ve Süleyman Ağa ma‘rifetleri ve bizim ma‘rifetimizle rü’yet eylediğimizde müddet-i mezkûrede bizden makbûzâtı kırk dokuz bin on bir guruşa bâliğ bi’l-cümle medfû‘ât ve masrûfâtı dahi otuz beş bin dokuz yüz yirmi guruş olmağla masrûfâtı fürû-nihâde oldukda mezbûr el-Hâc Mahmud Ağa bizden on üç bin doksan bir guruş ziyâde makbûzu olduğu zâhir olmağla meblağ-ı mezkûru istirdâd ederiz deyü da‘vâ eylediğimizde ol dahi inkâr ve beynimizde münaza‘ât-ı kesîre ve muhâsâmât-ı şedîde vâkı‘a olmuşdu el-hâletü hâzihi beynimizde muslihûn tavassut etmekle biz tasaddî eylediğimiz da‘vâ-yı mezkûremizde merkūm el-Hâc Mahmud Ağa ile altı bin guruş üzerine her birimiz sulh olduğumuzda ol dahi sulh-i mezkûru ba‘de’l-kabûl bedel-i sulh-i mezkûr altı bin guruşdan mâ‘adâ târih-i mezbûrdan işbu târih-i i‘lâma gelince beynimizde cereyân eden cemî‘ ahz u i‘tâya vesâir hukūk-ı şer‘iyyeye müte‘allika âmme-i de‘âvî ve mütâlebât ve kâffe-i eymân ve muhâsamâtdan her birimiz âharın zimmetini ibrâ-yı âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik deyü takrîrlerini merkūm el-Hâc Mahmud Ağa ba‘de’t-tasdîk ibrâdan istisnâ olunan bedel-i sulh-i mezkûr altı bin guruşu müdde‘ûn-ı mezbûrûna edâ ve teslîme mezbûr el-Hâc Mahmud Ağa’ya tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-27 min-Zilka‘de sene [1]216