İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 200 Hüküm no: 202 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eskeneyorgaki v. Yani’nin, Osman Ağa b. Mehmed’e olan borcunun tecil edildiği Tecil Ma‘rûz Lağımcı ocağı neferâtından sâhib-i arzuhâl Osman Ağa b. Mehmed meclis-i şer‘-i münîrde arzuhâlde mastûr İngiltere himâyesinde olan Eskene Yorgaki v. Yani muvâcehesinde tercümânı Anton Bizayi hâzır olduğu hâlde mersûm Eskene Yorgaki zimmetinde cihet-i havâleden alacağım olan bin yetmiş guruşdan bâkī beş yüz yirmi guruş alacağım olmağla hâlâ taleb ederim deyü tasaddî eylediğim da‘vâmdan bâ-tavassut-ı muslihîn mesfûr Eskene Yorgaki ile kat‘an li’n-nizâ‘ dört yüz elli üç guruşa sulh olduğumda ol dahi sulh-i mezkûru ba‘de’l-kabûl ziyâde müdde‘âma ve bi’l-cümle husûs-ı mezkûra müte‘allika âmme-i da‘vâdan mersûm Yorgaki’nin zimmetini kabûlü hâvi ibrâ ve iskāt eylediğimden sonra bedel-i sulh-i mezkûr dört yüz elli üç guruşun elli üç guruşunu hâlâ ve bâkī dört yüz guruşun elli guruşunu şehr-i âtî Zilhiccesinin onuncu günü ve üç yüz elli guruşunu târih-i mezkûrdan beher şehr hitâmında bana ellişer guruş vermekle târih-i merkūmdan yedi ay tamamında bana edâ etmek üzere mersûm Eskene Yorgaki istimhâl eylediğine binâen ber-vech-i muharrer imhâl ve te’cîl eyledim deyü takrîrini mersûm Eskene Yorgaki tasdîk ve bedel-i sulh-ı mezkûr dört yüz elli üç guruşu ber-minvâl-i muharrer edâya ta‘ahhüd eylediği İslâmbol Mahkemesi’nden huzûr-ı âlîlerine i‘lâm olundu. Fî-27 min Za sene [1]216