İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 200 Hüküm no: 203 Orijinal metin no: [27a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Sâdık Efendi’nin mirasının eşi Fâtıma bt. Mehmed ile Şerife Emine ve Şerife Ayşe hanımlara münhasır olduğu Ma‘rûz Sâhib-i arzuhâl Çukadâr Hasan b. Ali meclis-i şer‘-i münîrde Kengiri kazâsı ahâlîsinden olup bundan akdem vefât eden kuzâtdan es-Seyyid Mehmed Sâdık Efendi’nin zevce-i metrûkesi Fâtıma bt. Mehmed tarafından husûs-ı âti’l-beyânda vekîl olduğu Molla Hasan b. Mehmed ve İbrahim b. Ömer şehâdetleriyle sâbit olan es-Seyyid Mehmed Tahir Çelebi b. Abdülbaki ve zî-rahim cihetinden hasran vârisleri Şerîfe Emine ve Şerîfe Âişe bintey Mehmed Efendi tarafından vekâleti şâhidân-ı mezbûrân şehâdetleriyle sâbit olan Abdülkādir Efendi b. Yusuf mahzarlarında bundan akdem kazâ-i mezbûr nâibi Mehmed Emin Efendi hâzır olduğu hâlde kazâ-i mezbûr civârında vâki‘ Cemaleddin nâm azîzin vakıf ve hâsıl olan gallesi kazâ-i mezbûr hâkimine teslîm olunup gurebâdan fevt olanların kefen bahâsına sarf olunması ve tevliyeti kuzâta müfevvez olup tapuya müstehak oldukda tapu ile Kengiri kādısından alınmasını şart eylediği araziye mutasarrıf olan merkūm es-Seyyid Mehmed Sâdık Efendi bilâ-veled fevt olmağla arazi-i mezkûra müstehakk-ı tapu olmağla sâbıkā nâibi el-Hâc Osman Efendi tapu-yı misli ile bana tefvîz ve yedime temessük i‘tâ etmişken merkūmân es-Seyyid Mehmed Çelebi ve Abdülkādir Efendi zabtıma mümâna‘at ederler deyü iddi‘âsında merkūmân istintak olundukda arâzi-i mezkûre üzerinde ebniyesi mülk âsiyâb ve eşcâr-ı mağrûse olmağla hakk-ı tapuyu müvekkilelerimiz mezbûretânın olduğuna binâen müdde‘î-i mezbûrun gıyâbında nâib-i hâzır-ı merkūm müvekkilelerime tefvîz etmekle bu vechile mümâna‘at ederiz deyip lâkin da‘vâları arâzi nizâ‘ı olup sâhib-i arzın huzûru lâzım olduğundan mâ‘adâ arâzi-i mezkûre üzerinde emlâk olduğunu müdde‘î-i mezbûr münkir olmağla mahallinde mütebeyyin olur mevâddan olup ve tarefeyn mahallinde terâfu‘a terâzi ve ittifâk ve nâib-i hâzır-ı merkūm Mehmed Emin Efendi dahi rızâsıyla mahâll-i mezkûra gitmeğe müte‘ahhid olmağla belde-i mezkûre nâibi efendi dâ‘îleri mahâll-i nizâ‘ üzerine varıp tarefeyne gadr ve himâyeden âri vech-i vecih-i şer‘î üzere terâfu‘-ı şer‘ ve ihkāk-ı hak olunmak bâbında nâib-i mûmâ-ileyh dâ‘îlerine ve mütesellimine hitâben emr-i âlîleri sudûru iktizâ eylediği İslâmbol Mahkemesi’nden huzûr-ı âlîlerine i‘lâm olundu. Fî-27 min-Zilka‘deti’ş-şerîfe sene [1]216