İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 201 Hüküm no: 204 Orijinal metin no: [27a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. İbrahim’in, önceki eşi Yarıcızâde Şeyh Ahmed Efendi ile Fâtıma bt. İsmail’in zimmetini ibra ettiği Te’dîbine râzıye Ma‘rûz İslâmbol’da Eğrikapı hâricinde sâkine sâhibe-i arzuhâl mu‘arrefetü’z-zât Âişe bt. İbrahim nâm hatun meclis-i şer‘-i münîrde sâbıkā zevci olan Yarıcızâde eş-Şeyh Ahmed Efendi hâzır olduğu hâlde merkūmun hâlâ zevcesi arzuhâlde mezkûre zâtı mu‘arrefe Fâtıma bt. İsmail nâm Hatun mahzarında işbu sene-i mübâreke Şa‘bâni’l-mu‘azzamının on beşinci günü malımdan mezbûre Fâtıma Hatun yedine îdâ‘ ve teslîm eylediğim bir sofra ma‘a peşkir ve iki makreme ve üç kenarlı bez-i don ve bir hilâli don ve bir yorgan yüzü ve sim zarf ile fuzûlen ahz eylediği bir anteri ve bir lahuri şal ve bir elmas çiçek ile mezbûre Fâtıma Hatun mâh-ı mezkûrun yirmi birinci günü başımın saçını dibinden kat‘ etmekle mûceb-i şer‘îsini taleb ederim deyü da‘vâ eylediğimde ol dahi cevâbında ber-vech-i muharrer müdde‘âlarımı inkârından mâ‘adâ işbu yedimde olup şehr-i mezkûrun yirmi yedinci günü târihiyle muvarraha şer‘iyyâtı merhûm Ömer Efendi’nin imzâ ve hatmini havîye bir kıt‘a hüccet-i şer‘iyye nâtıka olduğu üzere eşyâ-i mezkûre da‘vândan benimle kırk guruş bedel-i makbûza ba‘de’s-sulh ve’l-kabûl husûs-ı mezkûra ve târih-i merkūma gelince sâir hukūk-ı şer‘iyyeye müte‘allika âmme-i da‘vâdan zimmetimi ve ba‘dehû zevcim mezbûr seni ba‘de’t-tatlîk mehrin olan elli guruş ve nafaka-i iddetin için dahi on guruş ki cem‘an altmış guruşu Kasımpaşa nâibi huzûrunda sana teslîm sen dahi ba‘de’l-kabz benim zevcim hâzır-ı mezbûru âmme-i de‘âvî ve kâffe-i mütâlebâtdan ibrâ ve iskāt etmişdin deyü beni def‘a tasaddî ben dahi hüccet-i ûlâsının mazmûnunu ikrâr lâkin bedel-i sulhü kabz etmeyip kâziben ikrâr etmişdim deyip bu vechile beynimizde ba‘de vukū‘ı’l-münâza‘a bâ-tavassut-ı muslihîn ben tasaddî eylediğim sac kat‘ı da‘vâsından mezbûre Fâtıma Hatun ile kat‘an li’n-nizâ‘ elli guruşa sulh olduğumda ol dahi sulh-i mezkûru kabûl ve bedel-i sulh-i merkūmu işbu meclis-i şer‘de bana def‘ ve teslîm ben dahi tamamen ba‘de’l-kabz zikr olunan husûslara ve işbu târih-i i‘lâma gelince sâir bi’l-cümle hukūk-ı şer‘iyyeye müte‘allika âmme-i de‘âvî ve kâffe-i mütâlebâtdan mezkûre Fâtıma Hatun ile zevci hâzır-ı merkūmdan her birinin zimmetlerini ibrâ-yı âmm-ı sahîh-i şer‘î ile ibrâ ve iskāt eylediğimde onlar dahi ibrâmı kabûl eylediler deyü ba‘de’l-ikrâr ve’t-tasdîk bu vechile kat‘-ı nizâ‘ eylediklerinden sonra ba‘de’l-yevm mezbûre Âişe Hatun da‘vâ-yı mezkûreye tasaddî yâhud lisânıyla zevcân-ı mezbûrânı ta‘cîz ve tekdîre tasaddî ederse tedîb olunacağı kendiye tefhîm olundukda ol dahi tedîbine râziye olduğu İslâmbol Mahkemesi’nden huzûr-ı âlîlerine i‘lâm olundu. Fî-27 min-Zilka‘de sene [1]216