İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 202 Hüküm no: 205 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hicri 1216 yılı kurban bayramının ilanı İstanbul Kādısı İzzetlü Faziletlü Efendi Hazretleri İşbu i‘lâm-ı beşâret-irtisâmları Sultanü’l-hâfıkîn Hâdimü’l-Haremeyni’l-muhteremeyn Şevketlü Kerâmetlü Efendimiz hazretlerinin rikāb-ı müstetâblarına arz ve takdîm olundukda da‘avât-ı icâbet-âyât-ı şâhâneyi hâvi ve leyle-i muhtereme-i îd-i şerîfde resm-i dîrîn-i serînin icrâsına ruhsat-ı hümâyûn-ı şehinşâhâneyi muhtevî hatt-ı hümâyûn-ı inâyet-meşhûnları şeref-efzâ-yı sudûr olmağla mûcebince iktizâ-yı nizâmına himmet buyuralar deyü buyruldu. Fî-2 Z[ilhicce] sene [12]16 Kabe-i ashâb-ı Mina ve kıble-i erbâb-ı ricâ olan atebe-i ulyâlarına ma‘rûz-ı dâ‘î-i ubûdiyet inti‘mâlarıdır ki târih-i hicret-i eşref-i evlâd-ı Hazret-i Halil ve İsmail aleyhim ve alâ-âlihim etemme’t-teslîm mine’l-Kerîmi’l-Celîl Efendimiz hazretlerinin işbu bin iki yüz on altıncı senesi Hilâl-i Zilhicceti’l-mükerremi rü’yet olunmadığına mebni Zilka‘deti’ş-şerîfi selâsin ile itmâm ve mâh-ı mübârek-i merkūma yevm-i isneyn evvel-i a‘dâd-ı eyyâm olmağla dokuzuncu sülüsâ yevm-i arefe-i mağfiret-i Hüdâya ve ferdâsı yevm-i erba‘â îd-i edhâ-yı meyâmin-mutâyâ olup leyle-i mübâreke-i îd-i şerîfe ihtirâm ve ibâd-ı Müslimîne i‘lan ve ifhâm için cânib-i seniyyü’l-menâkıb-ı devlet-i aliyyeden kāmet-dilârâ-yı minârâta dîbâ-yı zerrîn-târ-ı kanâdil ile ilbâs-ı hil‘at ve bu vechile cümle ehl-i imân ve asl-ı Kabe-i Safa ve meserret kılınmak dîdne-i hasene-i saltanat-ı seniyyeden olup bir kā‘ide-i devlet-i aliyye-i ebed-müddet meddallâhû zılâle azametihâ ale’l-arzayn mâdârati’s-semâvâti ve irtefa‘at ol leyle-i mübârekede ve tîre-i müstahsene-i mezkûrenin alâ-mâ cera’l-âde baserâsına izin ve ruhsat-ı sâmîleri erzân buyrulur ise ol bâbda fermân-ı cihan-mutâ‘ları sudûru iktizâ eylediği İstanbul Mahkemesi’nden pîşgâh-ı melâik-mutâflarına i‘lâm olundu. Bâkī emr u fermân li-hazret-i veliyyü’n-ni‘meti ve’l-ihsân.