İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 203 Hüküm no: 207 Orijinal metin no: [27b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çubukçu esnafından Simyon v. Kaspar ile Artin v. Vartros’un kalfa olmalarına müsaade edilmesi Kalfa olmalarına râzı Ma‘rûz Çubukçu esnâfından Simyon v. Kaspar ve Artin v. Vartaros nâm zimmîler meclis-i şer‘-i münîrde Kethüdâ Ebûbekir Usta ve Yiğitbaşı Mehmed Tahir ve Yazıcı Hacı Mustafa ve Mütevellî el-Hâc Mehmed Emin ve Halil Usta muvâcehelerinde mersûm Simyon işbu hâzır bi’l-meclis merkūm Yazıcı Mustafa’ya ve mersûm Artin Usta olan Vartaros zimmîye hizmet ve san‘at-ı mezkûreyi tahsîl edip kalfa olmağla liyâkatimiz olduğunu ustalarımız merkūmân kethüdâ-yı merkūma ifade eylediklerinde ol dahi yedi sene şâkirdlik hizmetini etmeyince kalfalığa izin verilmesi hilâf-ı nizâm-ı esnâfdır deyü hilâf-ı şer‘-i şerîf ve inhisâr-ı bey‘ u şirâ hakkında şerefrîz-i sudûr eden hatt-ı hümâyûn-ı adâlet-redîfe mugāyir bizi men‘ etmekle mümâna‘atı men‘ ü def‘ olunmak murâdımızdır dediklerinde kethüdâ-yı merkūm dahi kalfa olmalarına râzı ve ba‘de’l-yevm mümâna‘at etmemek üzere ta‘ahhüd eylediği İslâmbol Mahkemesi’nden huzûr-ı âlîlerine i‘lâm olundu. Fî-25 min-Zilka‘de sene [1]216