İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 204 Hüküm no: 208 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Ahmed’in, Mehmed Raif Ağa b. Ali aleyhine açtığı davada muarazadan men edildiği Mu‘ârazadan men‘ Ma‘rûz Mahrûse-i Galata’ya muzâfe kasaba-i Tophane’de Çavuşbaşı Hammâmı civârında sâkin iken bundan akdem vefât eden Çubukçu Mehmed Ali b. Halil’in verâseti zevcesi Havvâ ile sulbî sagīr oğlu Halil ve kebîre kızı Fâtıma’ya ba‘de’l-inhisâr sagīr-i mezbûr Halil’in min-kıbeli’l-üm ceddesi ve kıbel-i şer‘den mansûbe vasîsi Fâtıma bt. Ahmed nâm Hatun meclis-i şer‘-i münîrde zikri âtî dükkâna bi’l-îcâreteyn mutasarrıf olan arzuhâlde mezkûr Mehmed Raif Ağa b. Ali mahzarında arzuhâl hâmişinde mastûr derkenâr nâtık olduğu üzere çubukçu esnâfının Galata’da altı aded çubukçu gediği olduğu baş muhâsebede mukayyed ve zikr olunan gediklerden bir gediğe âhar dükkânda olarak müteveffâ-i mezbûr Mehmed Ali mutasarrıf iken gedik âlâtını mezbûr Mehmed’in Galata’da Karaki kapısı dâhilinde helvacı karşısında vâki‘ kadîmi tekneci dükkânını istîcâr eylediği dükkâna nakl edip ba‘dehû fevt oldukda dükkân-ı mezkûrda tarafımızdan bir çubukçu Yahûdi’yi iskân etmişken mezbûr Mehmed Raif Ağa ihrâc etmekle suâl olunup iskânına cebr olunması bi’l-vesâye murâdımdır deyü tasaddî eylediği da‘vâsı takrîr-i meşrûhu üzere meşrû‘a olmadığından mâ‘adâ müteveffâ-i mezbûr kadîmi dükkânını terk ve dükkân-ı mezkûr sonradan nakl eylediğini dahi vasî-i mezbûre mu‘terife olup ve başmuhâsebe kaydında mutlak olarak altı aded gedik eğerce musarrah olup mahalleri ve dükkân-ı merkūma dâir bir nesne zikr olunmamağla müdde‘iye-i vasiyye-i mezbûre Fâtıma Hatun da‘vâ-yı mezkûresiyle merkūm Mehmed Raif Ağa’ya bî-vech-i şer‘î mu‘ârazadan men‘ olunduğu İslâmbol Mahkemesi’nden huzûr-ı âlîlerine i‘lâm olundu. Fî-23 min-Zilka‘de sene [1]216