İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 204 Hüküm no: 209 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Debbâğ esnafının önceki ahi babası Mahmud Ağa ve kethüda Hafız Mehmed Efendi’nin debbağ esnafına müdahale edemeyeceği Debbâğ esnâfının ahi babalarıyla kethüdâları ta‘ahhüdü Ma‘rûz Medîne-i Üsküdar’da vâki‘ debbâğ esnâfının ahi babaları Abdullah Ağa ve kethüdâları Mustafa Ağa ve yiğitbaşıları Osman ve ihtiyârlarından Mehmed Ağa ve es-Seyyid Ahmed ve İbrahim Efendi ve Ali Efendi ve es-Seyyid Yakub ve Abbas Efendi ve el-Hâc Ali Ağa ve es-Seyyid Mustafa ve es-Seyyid Mehmed Tahir ve el-Hâc Mehmed Emin Ağa ve el-Hâc Ahmed ve Yusuf Ağa ve Süleyman Ağa nâm kimesneler meclis-i şer‘-i münîrde mukaddemâ ahi babaları olan el-Hâc Mahmud ve kethüdâları olan karındaşı Hâfız Mehmed Efendi muvâcehelerinde mezbûrân kendi hallerinde olmayıp dâimâ bizi bi-gayr-ı hakkın tekdîr ve ta‘cîz edip tevzî‘ olunacak deri hisselerimizi ancak kendilerinin intifâ‘ları kasdıyla vermemek için hilâf-ı vâki‘ her birimizi birer bahâne ile ithâm ederek onar ve on beşer gün dahi ziyâde hisselerimizi vermeyip kat‘ eyledikleri hisselerimiz kendileri bi-gayr-ı hakkın debâgat ve beynimizde câri ahz u i‘tânın hesabını rü’yet etmeyip bu vechile cümlemize gadretmeleriyle mezbûrânın evzâ‘ ve etvârlarından bir türlü hoşnûd ve râzı değilleriz deyü her biri bi’l-muvâcehe iştikâ eylediklerinde mezbûrân el-Hâc Mahmud Ağa ve Hâfız Mehmed Efendi fîmâ ba‘d ahi babalık ve kethüdâlık dâ‘iyesinde olmayıp ancak kendi deri hisselerini alıp debâgat ve esnâfa dâir vesâir umûra karışmamak üzere her biri ta‘ahhüd eylediklerinde esnâf-ı mezbûrûn dahi ol vechile râzılar olup şikâyetlerini tehîr eyledikleri İslâmbol Mahkemesi’nden huzûr-ı âlîlerine i‘lâm olundu. Fî-27 min Za sene [1]216