İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 205 Hüküm no: 210 Orijinal metin no: [28a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçiler kethüdası Seyyid Mustafa Usta’nın, Çörekçi Mehmed Usta’ya borcunu ödemesi gerektiği 220 guruş hüküm Ma‘rûz Çörekçi Mehmed Usta b. Osman meclis-i şer‘-i münîrde sâbıkā çörekçiler kethüdâsı es-Seyyid Mustafa Usta muvâcehesinde merkūm es-Seyyid Mustafa Usta İstanbul’da Karagümrük kurbünde câmi‘-i şerîf karşısında vâki‘ bir bâb çörekçi dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin rub‘u mülkü olmak üzere iki yüz yirmi guruş semen-i makbûza bana bâ-hüccet bey‘ ve teslîm eylediğinden sonra rub‘ hisse-i mezkûresi Nikola nâm zimmînin mülkü olmağla hasran vârisi oğlu Yavan zimmî ba‘de isbâti’l-verâse rub‘ hisse-i mezkûreyi bi’l-istihkāk bâ-i‘lâm zabt etmekle merkūm es-Seyyid Mustafa Ustaya semen olmak üzere medfûum olan iki yüz yirmi guruşu hâlâ istirdâd ederim deyü da‘vâ ettikde ol dahi cevâbında kaziyye minvâl-i muharrer üzere olup ve meblağ-ı mezkûr iki yüz yirmi guruş müdde‘î-i mezbûra deyni olduğunu ikrâr u i‘tirâf etmekle mûcebince meblağ-ı mezkûr iki yüz yirmi guruşu müdde‘î-i mezbûr Mehmed Usta’ya edâ ve teslîme merkūm es-Seyyid Mustafa Usta’ya tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-29 min Za sene [1]216