İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 206 Hüküm no: 211 Orijinal metin no: [28a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vartros v. Ohanes ve Yoseb v. Estefan’ın kehribar üretip satmalarına engel olunmaması Kehribâ bey‘ u şirâsına mümâna‘at etmemeğe ta‘ahhüd Ma‘rûz Çubukçu esnâfının re‘âya ustalarından Vartaros v. Ohanes ve Yoseb v. İstefan ve Avakim v. İstefan nâm zimmîler meclis-i şer‘-i münîrde esnâf-ı mezkûre kethüdâsı Ebûbekir ve Yiğitbaşı Mehmed Tahir ve Yazıcı el-Hâc Mustafa ve mütevellî el-Hâc Mehmed Emin ve Halil Usta nâm kimesneler muvâcehelerinde biz esnâf-ı mezkûrenin pîr-perver ustalarından olup kehribâ i‘mâline kādir olmamızla kehribâ i‘mâl ve iştirâ murâd eylediğimizde kethüdâ vesâir ustalarımız merkūmûn bizi i‘mâlden men‘ irâdesinde olup hatta bundan akdem İstanbul kādısı olup hâlâ Rumeli pâyesiyle mükerrem olan Faziletlü Sa‘âdetlü Ahmed Şemseddin Efendi hazretlerinin zamânında Nemçe tüccârından üç nefer müste’menler ol târihde Kethüdâ Ömer vesâir ustalar muvâcehelerinde bu esnâda Der-aliyye’ye getirdiğimiz kehribâlarımızı râyici üzere dilediğimiz kimesneye bey‘ murâd eylediğimizde kethüdâ ve ustalar kehribâ bizim emti‘a‘-i mahsûsamızdandır bey‘ u şirâsı bize münhasırdır deyü kehribâlarımızı fuzûlî zabt ve beynlerinde tevzî‘ murâd ederler deyü da‘vâ ettiklerinde esnâf-ı merkūmûn dahi getirdikleri kehribârlara ta‘arruz etmeyip diledikleri kimesneye bey‘ etmek üzere tenbîh ve i‘lâm dahi olunmuşken yine kāni‘ler olmayıp ber-vech-i muharrer i‘mâlimize mümâna‘at etmeleriyle suâl olunup mümâna‘atları men‘ ü def‘ olunması murâdımızdır deyü da‘vâları mutâbık-ı şer‘-i şerîf ve men‘-i inhisâr-ı bey‘ u şirâ hakkında sâdır olan hatt-ı hümâyûn-ı sa‘âdet-redîfe muvâfık olmağla esnâf-ı merkumûn dahi fîmâ ba‘d müdde‘iyyûn-ı mersûmûnun kehribâr iştirâ ve i‘mâl ve ibâdullâha bey‘ u şirâlarına mümâna‘at etmemek üzere her birleri ta‘ahhüd eyledikleri İslâmbol Mahkemesi’nden huzûr-ı âlîlerine i‘lâm olundu. Fî-27 min Za sene [1]216