İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 206 Hüküm no: 212 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahûdilerin yılda bir kez pişirdikleri hamursuzdan akçe talep etmemesi için İhtisâb mültezimi Mustafa Ağa’ya tenbih edildiği İhtisâb mültezimi Yahûdilerden Hamursuz için akçe mütâlebesiyle rencîde etmemeğe ta‘ahhüd Ma‘rûz İstanbul ihtisâb mukāta‘ası mültezimi Mustafa Ağa meclis-i şer‘-i münîrde Yahûd tâifesinden Yaşova v. Matatiye nâm Yahûdi muvâcehesinde tâife-i mersûmenin senede bir defa tabh eyledikleri hamursuz için mukāta‘a-i merkūme mültezimleri tarafına dört bin akçe veregelmeleriyle meblağ-ı mezkûr dört bin akçeyi mersûm Yaşova Yahûdi tâife-i mersûmenin umûrlarını rü’yet eylediğine binâen bana teslîme mersûm Yaşova Yahûdi’ye cebr ve tenbîh olunmak matlûbumdur deyü tasaddî eylediği da‘vâsı meşrû‘ olmadığından mâ‘adâ husûs-ı mezkûr için emr-i âlî dahi vürûd eylemediğini mültezim-i merkūm Mustafa Ağa i‘tirâf etmekle ber-vech-i muharrer mütâlebesi hilâf-ı şer‘-i şerîf ve mugāyir-i rızâ-i âli olduğu kendiye tefhîm olundukda ol dahi fîmâ ba‘d husûs-ı mezkûr için mersûm Yaşova Yahûdi ile sâirlerine rencîde ve te‘addî etmemek üzere ta‘ahhüd eylediği İslâmbol Mahkemesi’nden huzûr-ı âlîlerine i‘lâm olundu. Fî-27 min-Zilka‘de sene [1]216