İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 207 Hüküm no: 213 Orijinal metin no: [28b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Büzmeci esnafının kadın elbiselerine süzeni nakş ederek çiçek işleyip satmasına, terzi esnafının müdahale etmemesi gerektiğinin tenbihi Terziler ile sûzenici esnâfının ta‘ahhüdü Ma‘rûz Âsitâne-i aliyye’de terzi esnâfından büzmeci tâ‘bir olunur Serupa v. Agob ve Karabet ve Kirkor ve Ohannes ve diğer Karabet ve Artin ve diğer Artin ve Angeli ve diğer Ohannes ve Simon ve âhar Karabet ve Bağdısar ve Kasber nâm zimmîler meclis-i şer‘-i münîrde sûzenici esnâfının kethüdâsı İbrahim b. Mustafa ile zimmî ustalarından Yiğitbaşı Ağvan ve Felibos ve Hürmüz nâm zimmîler muvâcehelerinde bir büzmeci esnâfı olup kendi malımız olan akmişeden nisâya mahsûs elbiseye sûzeni nukûş ve çiçek işlemek murâd eylediğimizde esnâf-ı merkūmun biz işleriz âhar kimesneye işletmeyiz deyü hilâf-ı şer‘-i şerîf ve men‘-i inhisâr-ı bey‘ u şirâ hakkında sâdır olan hatt-ı şerîfe mugāyir bize mümâna‘at etmeleriyle suâl olunup mümâna‘atları men‘ ü def‘ olunmak murâdımızdır dediklerinde esnâf-ı merkūmun ber-vech-i muharrer te‘addîlerini inkârlarından mâ‘adâ ba‘de’l-yem mümâna‘at etmeyip men‘ ve inhisâr-ı bey‘ u şirâ bâbında sâdır olan hatt-ı hümâyûn-ı adâlet-makrûn mazmûn-ı şerîfi üzere diledikleri kimesneye i‘mâl ettirsinler biz mümâna‘at etmeyiz deyü ta‘ahhüd eyledikleri İslâmbol Mahkemesi’nden huzûr-ı âlîlerine i‘lâm olundu. Fî-25 min-Zilka‘de sene [1]216