İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 208 Hüküm no: 214 Orijinal metin no: [28b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anton ve ortaklarının Beyoğlu’nda francala frını açmasına müsaade edilmesi için ferman talebi Ma‘rûz Sâdır olan fermân-ı âlîlerine imtisâlen mahrûse-i Galata hâricinde Beyoğlu nâm mahalde su terâzisi ittisâlinde vâki‘ bir bâb fırançala fırınının mutasarrıfı bundan akdem fırın-ı mezkûru âhar akara tebdîl için derûnunda kâin gedik tâ‘bir olunur âlât-ı lâzımesini mahrûse-i mezbûre hâricinde vâki‘ Mevlevîhâne ittisâlinde kâin habbâz fırınına nakil ve fırançalacı fırını olmak üzere küşâd ve tanzîm ve habbâz fırını kaydı terkīn olunup fırançalacı fırını olmak üzere gedik ashâbı yedine sûret i‘tâ olundukdan sonra fırın-ı mezkûr civârında vâki‘ mahallât ahâlîlerinin istid‘âlarıyla ke’l-evvel habbâz fırını olmak üzere küşâd ve kaydı tashîh olunup ve fırançalacı gediği kimesnenin mu‘teber gediği olmayan mahâll-i âhara nakil olunmak şürûtundan olmağla hâlâ Beşiktaş Nâibi İbrahim Efendi dâ‘îlerinin işbu i‘lâmında kasaba-i mezbûrda fırançalacı olmayıp ahâlîlerinden nâmizâc ve alîl olanlar fırançalaya muhtâc olmalarıyla âhar mahallerden fırançala tedâriğinde meşakkate dûçâr ve bâlâda muharrer fırançalacı gediği dahi el-ân bir mahalle nakil olunmuş olmayıp gedik-i mezkûra sâir şürekâlarıyla bi’l-iştirâk mutasarrıf olan Anton zimmî mâlikler oldukları gediği ekmekçi dükkânına ba‘îd münâsib bir mahalle nakle müte‘ahhid olduğu i‘lâm-ı mezkûrdan müstebân olmağla vech-i meşrûh üzere Başmuhâsebe’ye kayd ve yedlerine emr-i âlîşân i‘tâ buyrulması menût-ı irâde-i aliyyeleri idüğü İstanbul Mahkemesi’nden huzûr-ı âlîlerine i‘lâm olundu. Fî-3 min-Zilhicce sene 1216