İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 207 Hüküm no: 158 Orijinal metin no: [67-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeliha bt. Ahmed’in, evini müştemilatıyla birlikte Zeliha bt. Mehmed’e sattığı Ma‘rûz Mübârek ve mes‘ûd rikâb-ı kamer-tâb-ı merâhim-nisâb-ı şâhâneye takdîm-i arzuhâl eden mu‘arrefetü’z-zât Şerife Zeliha Hatun bt. Ahmed İstanbul Mahkemesi’nde meclis-i şer‘-i münîrde derûn-ı arzuhâlde mezkûretü’l-ism kezâlik mu‘arrefetü’z-zât diğer Şerife Zeliha Hatun bt. Mehmed muvâcehesinde yedimde mâlım ve mülküm olup medîne-i Üsküdar’a muzâfe Yoros nâhiyesine tâbi‘ Dereseki karyesinde vâki‘ ma‘lûmü’l-hudûd fevkānî ve tahtânî dört bâb oda ve bir matbah ve eşcâr-ı müsmire ve gayr-ı müsmireli yedi dönüm bahçeyi müştemil bir bâb mülk menzilimi bi-cümleti mâ-yeştemilühû ve yahvîhi tarafeynden bi’l-îcâb ve’l-kabûl bey‘-i bâtt-ı sahîh-i şer‘î ile mezbûre diğer Şerife Zeliha Hatun’a üç bin guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl ve semeni olan meblağ-ı mezkûr üç bin guruşun bin guruşunu kendine cihet-i deyn-i şer‘îden bâ-i‘lâm-ı şer‘î mahkûmün-bih zimmetimde deynim olan bin guruşa ba‘de’t-takas ve’l-mukāssatin ve’l-kabûl bâkīsi olan iki bin guruşu dahi işbu târih-i i‘lâmdan yirmi bir gün mürûrunda bana tamamen edâ ve teslîm etmek üzere mezbûre diğer Şerife Zeliha Hatun’u tecîl eylediğimde ol dahi kabûl ve meblağ-ı bâkī-i merkūmu ber-vech-i muharrer bana edâya ta‘ahhüd etmeğin fîmâ-ba‘d menzil-i mezkûr mezbûre diğer Şerife Zeliha Hatun’un mülk-i müşterâsı olup benim kat‘a alâka ve medhalim kalmamağla meblağ-ı bâkī-i mezkûrdan mâ‘adâ mebî‘-i mezkûrun tağrîr ve gabnine ve bi’l-cümle husûs-ı mezkûra ve sâir cemî‘ hukūk-ı şer‘iyeye müte‘allika âmme-i de‘âvîden tarafeynden her birimiz âharın zimmetini kabûlümüzü hâvî ibrâ-i âmm-ı sahîh-i şer‘î ile ibrâ ve iskāt edip bu vechile kat‘-ı münâza‘a eyledik deyü ikrâr ve tasdîkleri tescîl ve huzûr-ı [âlîlerine i‘lâm olundu] Fî-gurreti Zilhicce sene [1]257