İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 207 Hüküm no: 159 Orijinal metin no: [67-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bezzaz Mustafa Ağa, Ali Ağa ve Abacı Panayot’un, Çiftçi Hıristo’ya açtıkları alacak davasında haksız bulundukları Ma‘rûz Ashâb-ı arzuhâl Bezzâz Mustafa Ağa b. Osman <> ve Ali Ağa b. Mustafa ve Abacı Panayot v. İstirati nâm kimesneler meclis-i şer‘-i şerîf-i enverde Havâss-ı Refî‘a kazâsına muzâfe Çekmece-i Sagīr kurâlarından Anbarlı karyesi re‘âyâsından derûn-ı arzuhâlde ismi mastûr Panayot v. Petro nâm zimmî muvâcehesinde merkūmûndan merkūm Mustafa Ağa benim gāib ani’l-beled Çiftçi Hıristo zimmî zimmetinde cihet-i kefâletden bin dört yüz doksan iki guruş ve merkūm Ali Ağa benim dahi gāib-i mersûm zimmetinde kezâlik cihet-i kefâletden bin üç yüz yetmiş guruş alacağımız olmağla gāib-i mersûm Hıristo zimmî işbu sene-i mübâreke Şa‘bâni’l-mu‘azzamı’nın yirmi birinci günü İstanbul’da Mahmudpaşa Câmi‘-i şerîfi kurbünde Bezzâzlar Kethudâsı kahve dükkânında mebâliğ-i mezkûre her birimize zimmetinde deyni olduğunu nâtık ve târih-i mezkûr ile müverrah karz unvânıyla mu‘anven yedimize bir kıt‘a temessük i‘tâ eylediğinde mesfûr Panayot zimmî dahi gāib-i mersûmun ancak nısfına kefîl olmuş idi el-hâletü hâzihî mersûm Hıristo zimmî bu esnâda diyâr-ı âhara firâr ve ne mahâlde olduğu dahi ma‘lûm olmayıp lâkin ber-minvâl-i muharrer kefâletine binâen gāib-i mersûm Hıristo zimmîyi bulup bize teslîme yâhûd gāib-i mesfûr zimmetinde alacağımız olan mebâliğ-i mezkûreyi mâlından bize tazmîne mersûm Panayot zimmîye tenbîh olunmak murâdımızdır deyü takrîr-i meşrûhları üzere [68] tasaddî eyledikleri da‘vâları meşrû‘a ve iltifâta şâyân olmadığı kendilere tefhîm ve da‘vâ-yı mezkûreleriyle mersûm Panayot zimmîye bî-vech-i şer‘î mu‘ârazadan men‘ olundukları İstanbul Mahkemesi’nden huzûr-ı [âlîlerine i‘lâm olundu] Fî-gurreti Zilhicce sene 1257