İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 211 Hüküm no: 163 Orijinal metin no: [68-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âşinalıoğlu Bogos’un Alaplılı Mustafa Reis’e olan borcunu ödemesi için yapılan tenbih Mukābele şüd Ma‘rûz Sâhib-i arzuhâl Alablılı Mustafa Reis b. Mehmed meclis-i şer‘-i münîrde Vâlidehanı sarrâflarından derûn-ı arzuhâlde mastûrü’l-ism Âşinâlıoğlu Bogos v. Mıgırdıç zimmî muvâcehesinde mersûm Bogos zimmî zimmetinde sene-i sâbıkā şehr-i Ramazani’l-mübârekinin on beşinci günü mâlımdan ve yedimden beher çekisi on üçer guruşa olmak üzere iştirâ ve kabz eylediği yüz üç çeki hatab semeninden bin üç yüz otuz dokuz guruş hatab-ı mezkûru Çöplük İskelesi’nden Kumkapı İskelesi’ne nakl için iki kıt‘a mavna kirâlarına bi-şarti’r-rücû‘ emriyle mâlımdan medfû‘um olan seksen guruş ki cem‘an bin dört yüz on dokuz guruşu sarrâf-ı mersûmdan hâlâ taleb ederim deyü tasaddî eylediğim da‘vâmdan bâ-tavassut-ı muslihîn mersûm ile an-inkârin kat‘a li’n-nizâ‘ yedi yüz elli guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden tarafeynden her birimiz âharın zimmetini kabûlümüzü hâvî ibrâ-i âmm-ı sahîh-i şer‘î ile ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr yedi yüz elli guruşu müdde‘î-i mezbûr Mustafa Reis’e bi’t-taleb edâ ve teslîme mersûm Bogos zimmîye tenbîh olunduğu huzûr-ı [âlîlerine i‘lâm olundu] Fî 17 min-Zilhicce sene [12]57