Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 147 Hüküm no: 130 Orijinal metin no: [30a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hasan Usta’nın Seyyid Mustafa Ağa’dan aldığı borç karşılığında berber dükkânı gediğini rehin vermesi Sâbıkın hücceti, Nuri Efendi’nin zamanında olan hüccet sehven Nazif Efendi’ye kayd-şüd. Mahmiye-i İstanbul’da Eski Ali Paşa kurbünde Akşemseddin mahallesinde sâkin berber esnâfından es-Seyyid Hasan Usta b. Ali meclis-i şer‘-i şerîf-i enverde işbu bâ‘isü’l-vesîka es-Seyyid Mustafa Ağa b. Ahmed mahzarında ikrâr-ı tam ve takrîr-i kelâm edip mezbûr Mustafa Ağa bana malından altı yüz guruş idâne ve teslîm ben dahi yedinden istidâne ve kabz edip ve semen târih-i kitâbdan iki sene tamamına değin müeccel ve mev‘ûd olmak üzere yine mezbûr Mustafa Ağa’nın malından ve yedinden iştirâ ve kabz eylediğim bir hilâlî sâ‘at semeninden yüz seksen guruş ki ciheteyn-i mezkûreteynden cem‘an yedi yüz seksen guruş zimmetimde mezbûr Mustafa Ağa’ya vâcibü’l-edâ ve lâzımü’l-kazâ sahîhan deynim olmağla, ben deynim olan meblağ-ı mecmû‘-ı mezkûr mukābelesinde mahmiye-i mezbûrede Saraçhâne kurbünde berber ve sarrâc dükkânları beynlerinde kâin bir bâb berber dükkânı derûnunda mevcûde beyne’l-esnâf gedik ta‘bîr olunur yedimde emvâlim olan on ustura ve iki taş ma‘a tepsi ve bir leğen ve bir nühâs mangal ve bir kayış ve bir sitil ve bir bileyi taşı ve sâir âlât-ı lâzıme-i ma‘lûmemi dâyin-i mezbûr Mustafa Ağa’ya rehin vaz‘ ü teslîm eylediğimde ol dahi ber-vech-i muharrer irtihân ve kabz eyledikden sonra merkūm Mustafa Ağa âlât-ı muharrere-i mezkûreyi li-ecli’l-isti‘mâl bana i‘âre ve teslîm ben dahi yedinden isti‘âre ve kabz edip âlât-ı mezkûre hâlen yedimde âriyettir dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 24 Cemâziyelâhire sene 1241. Şühûdü’l-hâl: Ali Çelebi el-muhzır, Kethudâ İbrahim Ağa, Şeyh el-Hâc Mustafa Efendi, Du‘âcı İsmail Efendi, Yiğitbaşı es-Seyyid Nuri Ağa, Muhzır Emin Çelebi, Çavuş Mustafa Efendi