Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 336 Hüküm no: 379 Orijinal metin no: [64a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. İbrahim’in Zeyneb bt. Mehmed aleyhindeki eşya davasında anlaşma sağlanması Sulh, ibrâ, 70 guruş Mahmiye-i İstanbul’da Hırka-i şerîf kurbünde Akşemseddin mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Emine bt. İbrahim b. Abdullah nâm hatun meclis-i şer‘-i şerîf-i enverde kezâlik zâtı mu‘arrefe işbu bâ‘isetü’l-vesîka Zeyneb bt. Mehmed nâm hatun mahzarında ikrâr-ı tam ve takrîr-i kelâm edip eşyâ-yı memlûkemden mecmû‘u bin beş yüz guruş kıymetli bir şal <> ve bir elma kürk ve bir Selîmiye entarimi li-ecli’l-hıfz mezbûre Zeyneb Hatun’a îdâ‘ ve teslîm, ol dahi yedimden ahz ü kabz eyledikden sonra eşyâ-yı mezkûreyi mezbûre Zeyneb Hatun te‘addî ve taksîrinden nâşi istihlâk etmekle eşyâ-yı muharrere-i mezkûrenin yevm-i helâkde kıymet-i mezkûresi olan meblağ-ı mezbûr bin beş yüz guruşu ba‘de’s-sübût mezbûre Zeyneb Hatun’dan hâlâ taleb ederim deyü bundan akdem da‘vâya tasaddî etmiş idim. El-hâletü hâzihî beynimize muslihûn tavassut edip beni ber-minvâl-i muharrer tasaddî eylediğim da‘vâmdan yetmiş guruş üzerine inşâ-yı akd-i sulh eylediklerinde ben dahi sulh-ı mezkûru kabûl ve bedel-i sulh-ı mezbûru meclis-i sulhda mezbûre Zeyneb Hatun bana def‘ ü teslîm, ben dahi yedinden ahz ü kabz edip husûs-ı mezkûra ve ziyâde bin dört yüz otuz guruş müdde‘âma ve sâir hukūk-ı şer‘iyeye müte‘allika âmme-i da‘vâdan mezbûre Zeyneb Hatun’un zimmetini ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eyledi dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 27 B sene [1]242. Şühûdü’l-hâl: Mehmed Ârif b. Ali, Hasan b. Mehmed, Muhzır Mehmed Çelebi, Muhzır Ali Çelebi.