Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 336 Hüküm no: 380 Orijinal metin no: [64a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kosti v. Ananosti’nin bostan gediği hissesini satması Bostan mübâya‘a, 2000 guruş Havâss-ı refî‘a kazâsına muzâfe Çekmece-i sagīr nâhiyesine tâbi‘ Makrihora karyesinde Basmacılar kurbünde vâki‘ bir bâb bahçede mütemekkin Kosti v. Ananosti zimmî meclis-i şer‘-i şerîf-i enverde işbu bâ‘isetü’l-vesîka Fatıma bt. Abdullah’ın zevci ve tarafından husûs-ı âtîde tasdîka vekîl-i şer‘îsi Mehmed Emin Ağa b. Hasan mahzarında ikrâr-ı tam ve takrîr-i kelâm edip zikr olunan bostan derûnunda mevcûde beyne’l-esnâf gedik ta‘bîr olunur üç bel ve üç çapa ve üç sepet ve bir kantar ve bir terâzî ma‘a derâhim ve altı res öküz ma‘a saban ve dört bârgir ve iki tencere ve bir karavana ve bir tâbe ve sâir âlât-ı lâzıme-i ma‘lûme on altı sehm i‘tibârıyla iki sehmi benim ve dört sehmi âharın yedimizde emvâlimiz olmağla ben âlât-ı muharrere-i mezkûrede ber-i‘tibâr-ı mezbûr mâlik olduğum iki sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile bâ-izn-i şerîk [64b] müvekkile-i mezbûre Fatıma Hatun’a iki bin guruşa bey‘ ü temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ iki bin guruşu müşteriye-i mezbûre bana def‘ ü teslîm, ben dahi yedinden tamamen ahz ü kabz eyledim, fîmâ-ba‘d âlât-ı muharrere-i mezkûrenin ber-i‘tibâr-ı mezbûr iki sehmi mezbûre Fatıma Hatun’un emvâl-i müşterâsı ve hakk-ı sırfı olup benim kat‘a alâka ve medhalim kalmamışdır dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 24 [Receb] sene [1]242. Şühûdü’l-hâl: Sarı Ali Ağa b. Hüseyin, Kara Ali Ağa b. Ali, Kâtib Mehmed Emin Efendi, Feyzullah Çelebi el-muhzır, Emin Çelebi el-muhzır, Bekir Çelebi el-muhzır, Ali Çelebi el-muhzır, İbrahim Çelebi el-muhzır, Pazarcı Yordan v. Pretamoz.