Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 337 Hüküm no: 381 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âmine bt. Hacı Mustafa’nın vefat eden kardeşi Mehmed Emin’den intikal eden bağ hissesini satması Bağ mübâya‘ası, 600 guruş. Mahmiye-i İstanbul’da Horhor kurbünde Kızılminâre mahallesinde sâkin iken bundan akdem fevt olan Mehmed Emin Efendi b. el-Hâc Mustafa Bey verâseti zevce-i menkûha-i metrûkesi Âişe bt. Hasan ile li-ebeveyn kız karındaşı Amine’ye münhasıra ve terekesinin rub‘u zevcesi mezbûreye ve selâse-i erba‘ı kız karındaşı mezbûre Amine’ye inhisârı tahakkukundan sonra zâtı mu‘arrefe Âmine Hatun meclis-i şer‘-i şerîf-i enverde kezâlik zâtı mu‘arrefe işbu bâ‘isetü’l-vesîka mezbûre Âişe Hatun mahzarında bi’l-verâse ikrâr-ı tam ve takrîr-i kelâm edip medîne-i Üsküdar’a tâbi‘ İstavros karyesi hâricinde merhûm Abdullah Ağa toprağında vâki‘ bir tarafdan Cebecioğlu bağı ve iki tarafdan Balabanoğlu bağları ve bir tarafdan tarîk-i âm ile mahdûd ve derûnunda hüdâyî nâbit ceviz eşcârları ve su musluğunu müştemil bir kıt‘a kürûmu mülk bağ mûrisimiz karındaşım müteveffâ-yı mezbûrun hayatında ile’l-vefât bâ-hüccet-i şer‘iye müstakıllen yedinde mülkü olup ba‘de vefâtihî ber-tashîh-i mezkûr benimle zevcesi mezbûre Âişe Hatun’a mevrûs olmağla ben bağ-ı mahdûd-ı mezkûrdan ber-tashîh-i mezkûr mâlik olduğum üç sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müşterikem mezbûre Âişe Hatun’a altı yüz guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr altı yüz guruşu müşteriye-i mezbûre bana def‘ ü teslîm ben dahi yedinden tamamen ahz ü kabz eyledim, fîmâ-ba‘d bağ-ı mahdûd-ı mezkûrun mecmû‘u mezbûre Âişe Hatun’un irsen ve şirâen mülk-i mahzı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe]’t-tasdîki’ş-şer‘î mâ-vaka‘a bi’t-taleb ketb olundu.] Fî 4 Ş sene [1]242. Şühûdü’l-hâl: Muhzır Mehmed Çelebi, Muhzır Emin Çelebi, Muhzır Ali Çelebi, Muhzır Ebûbekir Çelebi.