Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 339 Hüküm no: 383 Orijinal metin no: [64b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Attar Molla Ali’nin Yakacık’taki Nakşibendiye zaviyesi nakit vakfı mütevellisinden borç alması İdâne Hücceti, 2300 guruş Medîne-i Üsküdar’a muzâfe Yoros nâhiyesine tâbi‘ Anadoluhisârı’nda sâkin Attâr Molla Ali b. Mustafa vâlidesi zâtı mu‘arrefe Fatıma bt. Abdullah nâm hatun hâzıra olduğu hâlde meclis-i şer‘-i şerîf-i enverde Kartal nâhiyesine tâbi‘ Yakacık karyesinde vâki‘ tarîk-i Nakşibendiye zâviyesinin nukūd-ı mevkūfesinin mütevellîsi işbu bâ‘isü’l-vesîka es-Seyyid el-Hâc Mustafa b. el-Hâc Mustafa tarafından husûs-ı âti’l-beyânda tasdîka vekîl-i şer‘îsi es-Seyyid Hafız Mehmed b. Osman mahzarında ikrâr-ı tam ve takrîr-i kelâm edip mütevellî-i merkūm mütevellîsi olduğu nukūd-ı mevkūfeden bana iki bin guruş idâne ve teslîm, ben dahi yedinden istidâne ve kabz etmemle meblağ-ı mezbûr iki bin guruş ile benim târih-i kitâbdan bir sene tamamınadeğin müeccel ve mev‘ûd olmak üzere yine mâl-ı vakıfdan mütevellî-i merkūm yedinden iştirâ ve kabz eylediğim bir hilâlî sâ‘at semeninden üç yüz guruş ki ciheteyn-i mezkûreteynden cem‘an iki bin üç yüz guruş vakf-ı mezbûr için mütevellî-i merkūma zimmetinde vâcibü’l-edâ ve lâzımü’l-kazâ sahîhan deynimdir deyüp hâzıra-i mezbûre Fatıma Hatun dahi meblağ-ı mezbûra tarafeynden bi’l-emr ve’l-kabûl ben dahi kefîl ve zâminim dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 29 B sene [1]242. Şühûdü’l-hâl: Osman Ağa, Câbî el-Hâc Ömer Efendi, Muhzır Ebûbekir Çelebi, Muhzır Ali Çelebi.