Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 340 Hüküm no: 384 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazancı Yorgi’nin Nikola v. Todori’den borç alması İdâne-i deyn hücceti, 1450 guruş Trabzon sancağında Yora karyesi re‘âyâsından olup mahmiye-i İstanbul’da Ayazma kapısı dâhilinde mütemekkin Kazancı Yorgi v. Totoya zimmî meclis-i şer‘-i hatîr-i lâzımü’t-tevkīrde yine karye-i mezbûre re‘âyâsından işbu hâmilü’r-rakīm Nikola v. Todori zimmî muvâcehesinde ikrâr-ı tam ve takrîr-i kelâm edip mersûm Nikola zimmî bana malından bin guruş idâne ve teslîm ben dahi yedinden istidâne ve kabz etmemle meblağ-ı mezbûr bin guruş ile semeni târih-i vesîkadan bir sene tamamına değin müeccel ve mev‘ûd olmak üzere yine mersûmun malından ve yedinden iştirâ ve kabz eylediğim bir hilâlî sâ‘at semeninden dört yüz elli guruş ki ciheteyn-i mezkûreteynden cem‘an bin dört yüz elli guruş mersûm Nikola zimmîye vâcibü’l-edâ ve lâzımü’l-kazâ sahîhan deynim olmağla ben deynim olan meblağ-ı mecmû‘-ı mezbûr mukābelesinde karye-i mezbûrede vâki‘ ma‘lûmü’l-hudûd bir bâb mülk menzil ve her biri ma‘lûmü’l-hudûd ve’l-kıt‘a mülk tarlalarımı ve ma‘lûmü’l-hudûd bir kıt‘a mülk çayır yerimi mersûm Nikola zimmîye rehin vaz‘ ü teslîm ve bundan akdem mahâllinde teslîm eylediğimde ol dahi ber-vech-i muharrer irtihân ve kabz ü kabûl eyledi dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 29 B sene [1]242. Şühûdü’l-hâl: Muhzır Ebûbekir Çelebi, Muhzır Ali Çelebi, Makdisi’nin oğlu Simon, Aci Trandafiloğlu İlya, Aspendiloğlu Aci Yorgi, Turnaoğlu Yorgi.