Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 340 Hüküm no: 385 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Seyyid Mehmed Ağa’nın vârislerinin Hafız Yusuf Efendi’yi vekil tayin etmeleri Vekâlet Hücceti, Mahrûse-i Bursa’da sâkin iken bundan akdem fevt olan Silahşorân-ı hâssadan es-Seyyid Mehmed Ağa b. Yusuf’un verâseti zevce-i menkûha-i metrûkesi Fatıma nâm-ı diğer Bedr-i Kamer bt. Abdullah ile li-ebeveyn er karındaşı İbrahim’e inhisârı tahakkukundan sonra zâtı mu‘arrefe Fatıma ile mezbûr İbrahim meclis-i şer‘-i şerîf-i enverde işbu bâ‘isü’l-vesîka Hafız Yusuf Efendi b. Mustafa mahzarında bi’l-verâse ikrâr-ı tam ve takrîr-i kelâm edip mûrisimiz müteveffâ-yı mezbûrun hîn-i vefâtında yanında mevcûde bi’l-cümle terekesini mahrûse-i mezbûre kādısı efendi bi’l-emâne ahz ü kabz etmekle tereke-i müteveffâ-yı mezbûru mahâllinde efendi-yi mûmâ-ileyhden taleb ve da‘vâ ve ahz ü kabza ve makbûzunu bize îsâl ve irsâle ve husûs-ı mezkûr mütevakkıf olduğu umûrun küllîsine tarafımızdan merkūm Hafız Yusuf Efendi’yi bi’l-verâse vekîl ve nâib-i menâb nasb ü ta‘yîn eyledik dediklerinde ol dahi ber-vech-i muharrer vekâlet-i merkūmeyi kabûl ve merâsimini kemâ-yenbagī mahâllinde edâya ta‘ahhüd ve iltizâm etmeğin mâ-vaka‘a [bi’t-taleb ketb olundu.] Fî 3 Ş sene [1]242. Şühûdü’l-hâl: Muhzır Fettah Çelebi, İbrahim b. Hüseyin, Mustafa b. Hasan, Muhzır Ali Çelebi.