Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 345 Hüküm no: 392 Orijinal metin no: [65b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Vefat eden Kasap İstefani’nin oğullarının tuhafiye dükkânı gediği hisselerini annelerine satmaları
Tuhafçı gediği, 12000 guruş
Mahmiye-i İstanbul’da Samatya kurbünde Mirâhor mahallesinde mütemekkin iken bundan akdem hâlik olan Kasab İstefani v. Angeli zimmînin verâseti zevce-i menkûha-i metrûkesi Zafiriçe bt. Mihal Nasrâniye ile sulbî kebîr oğulları Ligori ve Kostaki ve Sotri zimmîlere münhasıra ve tashîh-i meselesi yirmi dört sehmden olup sihâm-ı mezbûreden üç sehmi zevcesi mersûmeye ve yedişer sehmden yirmi bir sehmi oğulları mersûmûna isâbeti tahakkukundan sonra mersûmûn Ligori ve Kostaki ve Sotri zimmîler meclis-i şer‘-i hatîr-i lâzımü’t-tevkīrde işbu hâmiletü’r-rakīm şahsını mu‘arrefe mersûme Zafiriçe Nasrâniye muvâcehesinde her biri bi’l-verâse ikrâr-ı tam ve takrîr-i kelâm edip mahmiye-i mezbûrede Kalpakçılar sûkunda Sorguçcu Hanı ittisâlinde kâin bir bâb tuhafçı dükkânı derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı lâzıme-i ma‘lûme mûrisimiz babamız hâlik-i mersûm İstefani zimmînin müstakıllen bâ-hüccet-i şer‘iye yedinde emvâli olup ba‘de helâkihî ber-tashîh-i mezkûr bizimle anamız mersûme Zafiriçe Nasrâniyeye mevrûs olmağla biz âlât-ı lâzıme-i ma‘lûme-i mezkûrede ber-tashîh-i mezkûr mâlikler olduğumuz yirmi bir sehm hissemizi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile anamız müşterikemiz mersûme Zafiriçe Nasrâniyeye on iki bin guruşa bey‘ ü temlik ve teslîm eylediğimizde ol dahi ber-vech-i [66a] muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr on iki bin guruşu müşteriye-i mersûme bize def‘ ü teslîm biz dahi yedinden tamamen ahz ü kabz eyledik. Fîmâ-ba‘d âlât-ı lâzıme-i ma‘lûme-i mezkûrenin mecmû‘u anamız mersûme Zafiriçe Nasrâniyenin irsen ve şirâen müstakıllen emvâl-i mahzı ve hakk-ı sırfı olup bizim kat‘a alâka ve medhalimiz kalmamağla mebî‘i mezkûrun tağrîr ve gabnine müte‘allika da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.]
Fî 10 Ş sene [1]242.
Şühûdü’l-hâl: Muhzır Ali Çelebi, Muhzır Mehmed Çelebi, Muhzır Emin Çelebi.
|