Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 409 Hüküm no: 474 Orijinal metin no: [76a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeliha bt. Hafız İbrahim’in Manav dükkânını satması Dükkân mübâya‘ası, 150 guruş Mahmiye-i İstanbul’da Karagümrük kurbünde Hadice Sultan mahallesinde sâkine ve zâtı ta‘rîf-i şer‘î ile mu‘arrefe olan Şerife Zeliha bt. Hafız İbrahim nâm hatun meclis-i şer‘-i şerîf-i enverde işbu bâ‘isü’l-vesîka Mustafa Ağa b. Osman mahzarında ikrâr-ı tam ve takrîr-i kelâm edip akd-i âti’z-zikrin sudûruna değin müstakıllen yedimde emvâlim olan mahalle-i mezbûrede vâki‘ tarafeyni papuşçu dükkânları ile mahdûd bir bâb mülk manav dükkânımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile merkūm Mustafa Ağa’ya yüz elli guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr yüz elli guruşu müşteri-yi merkūm bana def‘ ü teslîm ben dahi yedinden tamamen ahz ü kabz eyledim, fîmâ-ba‘d dükkân-ı mahdûd-ı mezkûr merkūm Mustafa Ağa’nın mülk-i müşterâsı ve hakk-ı sırfı olup benim kat‘a alâka ve medhalim kalmamışdır dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 15 N sene [1]242. Şühûdü’l-hâl: Muhzır Ali Çelebi, Muhzır İsmail Çelebi.