Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 318 Hüküm no: 340 Orijinal metin no: [65b-3, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vârisi bulunmadığı zannıyla terekesi Beytülmâlce zabt edilen müteveffâ Hüseyin’in vârislerinin olduğu Rumeli-i ma‘mûre vilâyetinde vâki‘ Morava? kasabası ahâlîsinden udûlden Mustafa Çelebi b. Salih Efendi ve Mustafa b. Abdullah ve Mustafa b. Ali ve Mehmed Çelebi b. Hasan ve Ahmed b. Mustafa ve Abdi Beşe b. Abdullah er-râcil ve Murad Beşe b. Abdullah er-râcil nâm kimseler meclis-i şer‘-i şerîfe hâzırûn olup medîne-i Galata ve tevâbi‘i Beytülmâli emîni olan ve kasaba-i mezkûre ahâlîsinden olup bundan akdem medîne-i Galata-i mezbûre tevâbi‘inden Kasımpaşa kasabasında vefât eden Hüseyin b. ( ) nâm müteveffânın terekesine vâzı‘-ı yed bulunan fahrü’l-a‘yân Murad Ağa b. Abdülmennan kıbelinden husûs-i âti’z-zikre vekâleti bi-mâ hüve nehcü’s-sübût şer‘an sâbit olan, âti’z-zikr verâseti münkir zahrü’l-cüyûş Mehmed Çavuş b. Ahmed nâm hasm-ı câhid mahzarında, Fâtıma bt. Abdullah kıbelinden asâleten, Fâtıma bt. Hasan’ın kendi nefsinden asâleten, müteveffâ-yı mezbûr Hüseyin’den olma İslâm ve Fethullah nâm sagīreyn çocuklarının vasîsi olarak vesâyeten sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, mezbûre Fâtıma bt. Abdullah müteveffâ-yı mezkûrun anasıdır. Sagīreyn-i mezkûreyn ise merhûmun sulbî oğullarıdır. Fâtıma bt. Hasan el-mezbûre müteveffâ-yı mesfûrun vefâtına kadar taht-ı nikâhındaki zevce-i menkûhasıdır. Verâseti onlara münhasırdır. Onlardan başka vâris ve terekeye müstehak kimse ma‘lûmumuz değildir. Şehâdeten sahîhaten şer‘iyyeten ba‘de ca‘li şerâiti’l-kabûl hâkim şehâdetleri mûcebince hükmetti. Cerâ zâlike ve hurrire fî-evâhiri’l-Muharremi’l-harâm li-sene erba‘a ve selâsîn ve elf. Şühûdü’l-hâl: Ahmed Ağa b. bevvâb, Mustafa b. Ahmed çukadâr, Mustafa Çavuş b. tâbi‘-i hazreti Efendi?, İbrahim Çelebi b. el-bevvâb, Himmet Reis b. ( ) ve gayrühüm