Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 484 Hüküm no: 493 Orijinal metin no: [72a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Mehmed Efendi’nin aldığı iki bin guruş borç karşılığında mülk hamamını müştemilatıyla birlikde Hacı Osman Bey’e rehin verip üç yıllığına kiraladığı Mahmiye-i İstanbul’da Şehzâde Sultân Mehmed Hân Câmi‘-i Şerîfi kurbünde Emin Nureddin mahallesi sâkinelerinden Fâtıma bt. Mehmed Efendi nâm hâtun mahalle-i mezbûrede vâki‘ kendi mülkü olan Ovulma Hamamı’nda akd-i meclis-i şer‘-i hatîrde hâlâ Sultân Bayezid hamamcısı olan sâhibü hâze’l-kitâb el-Hâc Osman Bey b. Abdurrahman nâm bevvâb-ı sultanî mahzarında tav‘an ikrâr ve i‘tirâf edip zikri âtî akdin sudûruna değin silk-i mülk-i sahîhimde münselik mülk ve hakkım olup bir tarafdan Murad Ağa b. ( ) mülküne ve bir tarafdan Kara Davud Paşa Odaları demekle ma‘rûf odalara ve bir tarafdan bazen Mukābeleci Mehmed Efendi Vakfı’na ve bazen yine kendi mülk menzilime ve bazen Kara Çelebizâde Mehmed Efendi Vakfı olan odalara ve bir tarafdan tarîk-ı âmma müntehî Ovulma ta‘bîr olunur iki kebîr halvetli ve bir sagīr halvetli ve on iki kurnalı ve câmekânlı işbu cemî‘ mülk Ovulma Hamamı sokak kapısı üzerinde vâki‘ bir fevkānî odası ve sokak kapısından câmekânı önüne gelince vâki‘ arsa-i hâliyesi ile ve bir dolab kuyusu ile ve bir sagīr kapısı ile ve külhanı ile ve bir bârgiri ile ve beynimizde ilm-i şer‘î [ile] ma‘lûm cemî‘ hamam esvâbı ile ve kâffe-i hukūk ve merâfıkı ve âmme-i tevâbi‘ ve levâhıkı ile iki bin kıt‘a riyâlî guruşa safka-i vâhide ile tarafeynden îcâb ve kabûlü hâvî bey‘le merkūm el-Hâc Osman Bey’e bi-tarîkı’l-istiğlâl bey‘ ve teslîm edip ol dahi iştirâ ve tesellüm ettikden sonra semen-i merkūm iki bin riyâlî guruşu cihet-i deyn-i şer‘îden merkūm el-Hâc Osman Bey’in zimmetime edâsı lâzım ve kazâsı vâcib iki bin riyâlî guruş hakkı ile takās ettiğimden sonra ba‘de’t-tahliyeti’ş-şer‘iyye ve’t-tekābuzı’l-mer‘î işbu hamamı târih-i kitâbdan bin seksen gün tamâmına değin her üç yüz altmış günde yirmi bir bin altı yüz akçesin vermek üzere bin seksen gün tamâmına değin altmış dört bin sekiz yüz râyic [fi’l]-vakt akçeye bana îcâr ve teslîm edip ben dahi istîcâr ve tesellüm eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: es-Sâbıkūn ve gayruhüm mine’l-[hâzırîn]