Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 204 Hüküm no: 177 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Danyel v. Yorgi’nin Tımışvar vladikalığı görevini Körke adlı râhibe ferâğ şartıyla ondan aldığı parayı göreve başka birinin tayin edilmesinden ötürü iade etmesi Sâbıkā Vilâyet-i Rumeli’nde medîne-i Tımışvar ve tevâbi‘i eyâleti keferesinin uladikası olan Körke v. ( ) nâm râhib tarafından husûs-ı âti’z-zikre vekîl olup fi’l-asl vilâyet-i mezkûrede Yanya kazâsına tâbi‘ İstarola nâm karye ahâlîsinden olup hâlâ mahmiye-i İstanbul’da merhûm Sultân Süleyman -aleyhi’r-rahmetü ve’r-rıdvân- hânında bi-tarîkı’l-müsâfere sâkin Arsenye v. Miloş ve Andermi v. Körerçe nâm zimmîler şehâdetleriyle şer‘an vekâleti sâbite olan Pavlo v. Nikola nâm zimmî meclis-i şer‘-i şerîf-i enverde Danyel v. Yorgi nâm zimmî muvâcehesinde bi’l-vekâle üzerine da‘vâ ve takrîr-i kelâm edip bundan akdem müvekkilim merkūm Körke eyâlet-i mezkûrede berat-ı şerîf-i âlî-şân ile uladika olup bir vechile azl îcâb eder hâli yoğiken mücerred mezbûr alîl olup edâ-i hizmete kādir değildir deyü mezbûr Danyel zikrolunan uladikalığı müvekkilim mezbûr Körke’nin üzerinden ref‘ ve kendi üzerine berat-ı şerîf-i âlî-şân ettirdikden sonra mezbûr Danyel zikrolunan uladikalık hizmetini uhdesinden gelmeğe bir vechile iktidârı olmamağla zikri mürûr eden uladikalığı tekrar müvekkilim mezbûr Körke’ye ferâğ ve ol mukābelede müvekkilim mezbûr Körke’nin bin iki yüz on esedî guruşunu ahz ü kabz ve tesellüm etmişidi lâkin müvekkilim mezbûr zikrolunan uladikalığı zabtetmeksizin zikrolunan uladikalık tara[f]-ı Saltanat-ı Aliyye’den berat-ı şerîf-i âlî-şân ile Mihail nâm zimmîye tevcîh olunmağla meblağ-ı mezbûr bin iki yüz on esedî guruşu mezbûr Danyel’den taleb eylediğimde bana teslîmden imtinâ‘ eder suâl olunup meblağ-ı mezbûrun alıverilmesi murâdımdır dedikde gıbbe’s-suâl mezbûr Danyel zikrolunan uladikalığı müvekkil-i mezbûra ferâğ ve müvekkil-i mezbûr zikri mürûr eden uladikalığı zabtetmeksizin zikrolunan uladikalık taraf-ı Saltanat-ı Aliyye’den berat-ı şerîf-i âlî-şân ile Mihail nâm zimmîye tevcîh olunduğunu ikrâr lâkin ber-vech-i muharrer meblağ-ı mezbûr bin iki yüz on esedî guruş ahzını bi’l-külliye inkâr edicek vekîl-i mezbûr Pavlo’dan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup fi’l-asl vilâyet-i mezkûrede İpek kazâsına tâbi‘ Kodik nâm karye ahâlîsinden olup hâlâ hân-ı mezkûrede bi-tarîkı’l-müsâfere sâkin Osman b. Hasan nâm kimesne ile Malişe v. Radovan nâm zimmî li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ mezkûr Danyel zikrolunan uladikalığı müvekkil-i mezbûr Körke’ye ferâğ etdikde ol mukābele müvekkil Körke’den bizim huzûrumuzda bin iki yüz on esedî guruş ahz ü kabz ve tesellüm eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle oldukdan sonra mezbûr Danyel müvekkil-i mezbûr Körke’den meblağ-ı mezbûr bin iki yüz on esedî guruşu ber-vech-i muharrer ahz ü kabzını bi-tav‘ihiikrâr ve i‘tirâf dahi etmeğin mûcebiyle meblağ-ı mezbûru müvekkil-i mezbûra edâ ve teslîme merkūm Danyel’e tenbîh olunup mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ min-Saferü’l-hayr li-sene ihdâ ve tis‘în ve elf. Şuhûdü’l-hâl: Mehmed Çavuş el-Mübâşir, Mehmed Çelebi b. Haydar, Mehmed b. Piyale, Osman b. Hasan, Ahmed Çelebi [b.] Piyale.