Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 392 Hüküm no: 492 Orijinal metin no: [100a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Farik’in Hasan Efendi ve eşi vefat eden Ayşe aleyhindeki alacak davasında anlaşma sağlanması Ma‘rûz, Sarrâf tâifesinden Farik v. David zimmî mahfil-i şer‘iyyâtda Hasan Efendi b. Abdullah nâm kimesne, müteveffât Âişe bt. el-Hâc Hasan nâm Hatunun sadrî oğlu İsmail’in bâ-hüccet vasîsi olup zâtı ta‘rîf-i şer‘î ile mu‘arrefe olan Hanife Hatun muvâcehelerinde mezbûr Hasan Efendi ile müteveffât-ı mezbûre Âişe Hatun zimmetlerinde her biri âharın zimmetine lâzım gelen mikdâr mâla kefîl ve zâmine olmak üzere bâ-temessük cihet-i karzdan dört yüz guruşdan bâkī üç yüz yirmi altı guruş seksen akçe hakkı olduğunu mezbûrân Hasan Efendi ve vasiyy-i mezbûre Hanife Hatun muvâcehelerinde ba‘de’l-isbât ve’l-half ve’l-hükm merkūm Farik zimmî meblağ-ı mezbûrdan merkūmân Hasan Efendi ve vasiyy-i mezbûre Hanife Hatun ile nef‘an li’s-sagīr iki yüz yirmi beş guruş bedel-i makbûza sulh olup mâ‘adâsına ve sâire müte‘allika âmme-i da‘vâdan mezbûr Hasan Efendi ve zevcesi Fâtıma ve vasiyy-i mezbûre Hanife ve sagīr-i mezbûr İsmail’den her birinin zimmetini ibrâ ve iskāt edip ve her biri zimmî-yi mezbûrun ibrâsını tasdîk ve kabûl etmeğin kat‘-ı nizâ‘ etdikleri huzûr-ı âlîlerine i‘lâm olundu. Fî-selhi Muharrem sene 1172.