Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 392 Hüküm no: 493 Orijinal metin no: [100b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mosi ve oğlu Avram’a kefaletten dolayı olan borcunu ödemesi hususunda Ali b. Mehmed’e tenbihte bulunulması Bâ-mühr-i efendi, Ma‘rûz, Kendiden asıl ve oğlu Avram Yahûdi tarafından zikri âtî husûsda vekîl olan arzuhâl eden Mosi v. Yako Yahûdi meclis-i şer‘-i münîrde derûn-ı arzuhâlde mezkûrü’l-ism Ali b. Mehmed mahzarında yedimde olup bin yüz yetmiş bir senesi Recebi’nin yirmi yedinci günüyle müverrah işbu bir kıt‘a deyn temessükü mantûkunca oğlum ve müvekkilim mezbûr Avram ile beynimizde müşterek malımızdan mahrûse-i Selanik ahâlîsinden Şahbendizâde el-Hâc Hüseyin Ağa b. Abdullah zimmetinde cihet-i karzdan üç bin dört yüz on sekiz guruş ve yedimden iştirâ ve kabz eylediği zirâ‘ı beynimizde ma‘lûm çuka bahâsından iki yüz yetmiş üç guruş ki cem‘an ciheteyn-i mezkûreteynden üç bin altı yüz doksan bir guruş hakkımız olup mezbûr Ali meblağ-ı mecmû‘-ı mezkûrun edâsına bi’l-emr ve’l-kabûl kefîl ve zâmin olmağla meblağ-ı mecmû‘-ı mezkûru ber-vech-i muharrer kefâletine binâen mezbûr Ali’den hâlâ taleb ederim deyü da‘vâ ve mezbûr Ali cevâbında meblağ-ı mecmû‘-ı mezkûra kefâletini ikrâr lâkin, ben mezbûr el-Hâc Hüseyin Ağa’nın yanında ve hizmetinde olmağla mezbûr el-Hâc Hüseyin temessükü mührüyle ve meblağ-ı mezbûra kefîl ol, eğer olmazsan seni darb-ı şedîd ile katl ederim deyü tehdîd ve bana bu vechile kerh edip tehd[îdi]ni îkā‘a kādir olmağla, ben dahi mükrehen temessükü mühürleyip ve meblağ-ı mezkûra kefîl olmuş idim deyü ba‘de’d-def‘ ve’l-inkâr mezbûr Ali kerh ve mu‘teber da‘vâsını isbât için yirmi günden beri bi’d-defa‘ât ba‘de’l-istimhâl ve’l-imhâl bir vechile isbâta kādir olmayıp mesfûrânı tahlîfe dahi tâlib olmamağın mezbûr Ali def‘-i mezkûruyla bilâ-beyyine-i âdile bî-vech mu‘ârazadan ba‘de’l-men‘ ikrârı mûcebince bi-hükmi’l-kefâle lâzım gelen meblağ-ı mecmû‘-ı mezkûr üç bin altı yüz doksan bir guruşu mesfûrân Mosi ve Avram Yahûdilere edâ ve teslîme mezbûr Ali’ye tenbîh olunduğu huzûr-ı âlîlerine i‘lâm olundu. Fî 28 Muharrem sene 1172.