Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 393 Hüküm no: 494 Orijinal metin no: [100b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Efendi’nin alacak iddiasıyla Berber Ömer’i taciz etmemesi Bâ-mühr-i efendi, Ma‘rûz, Sâhib-i arzuhâl Hüseyin Efendi b. Abdullah meclis-i şer‘-i münîrde derûn-ı arzuhâlde ismi mezkûr Berber el-Hâc Ömer b. Mustafa mahzarında bin yüz yetmiş senesi Recebi’nin on beşinci günü Nahilbend’de sâkin olduğum menzilde mezbûr Berber el-Hâc Ömer’e malımdan dört yüz elli beş guruş ikrâz ve teslîm, ol dahi yedimden iktirâz ve kabz ve kendi masârıfına sarfla istihlâk edip beş gün murûrunda Sipah Çarşısı’nda ol vakitde ticâretde olduğum dükkânda huzûr-ı Müslimînde meblağ-ı mezkûr ciheteyn-i mezbûreden zimmetinde bana deyni olduğunu ikrâr dahi etmekle hâlâ taleb ederim deyü da‘vâ ve mezbûr Berber el-Hâc Ömer cevâbında, müdde‘î-i mezbûrun ber-vech-i muharrer müdde‘âsını inkârından mâ‘adâ mezbûr Hüseyin Efendi meblağ-ı mezkûru bin yüz yetmiş bir senesinde dahi benden ba‘de’d-da‘vâ ve’l-inkâr mezbûr Hüseyin Efendi sene-i mezkûre Ramazanı’nın on beşinci günü Eyüb’de vâki‘ berber dükkânıma gelip meblağ-ı mezkûr mutâlebesiyle seni ta‘cîz eyledim, da‘vâmın kat‘â aslı yokdur deyü meblağ-ı mezkûra müte‘allika âmme-i de‘âvîden benim zimmetimi ibrâ etmekle ben dahi ibrâsını kabûl etmiş idim deyü ba‘de’d-def‘ ve’l-inkâr dâfi‘-i mezbûr Berber el-Hâc Ömer ber-vech-i muharrer def‘ini lede’t-tezkiye şehâdetleri makbûle olan Eyüb’de Sofular mahallesinden Berber Mustafa Çelebi b. Hüseyin ve Câmi‘-i kebîr mahallesinden Çukadâr İbrahim b. Hüseyin ve Ali Paşa mahallesinden Berber Ahmed Çelebi b. Hasan şehâdetleriyle muvâcehesinde vech-i şer‘î üzere isbât etmeğin mûcebiyle müdde‘î-i mezbûr Hüseyin Efendi’nin meblağ-ı mezkûr mutâlebesiyle mezbûr Berber el-Hâc Ömer’e bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 28 Muharrem sene 1172.