Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 394 Hüküm no: 495 Orijinal metin no: [101a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin’in bargir ve un bedelinden alacak iddiasında bulunduğu Canbaz Süleyman aleyhindeki davasının reddedilmesi Ma‘rûz, Sâhib-i arzuhâl el-Hâc Hüseyin mahfil-i şer‘iyyâtda derûn-ı arzuhâlde mezkûrü’l-ism Canbâz Süleyman nâm kimesne muvâcehesinde mezbûr Süleyman zimmetinde üç re’s bârgir bahâsıyla ma‘lûmü’l-mikdâr dakīk-i hâs bahâsından ba‘de külli’l-hesâb yüz on dört guruş alacağım olup hattâ târîh-i i‘lâmdan on beş gün mukaddem Atpazarı’nda Kahveci es-Seyyid Ali’nin dükkânında sâlifü’z-zikr bârgir ve dakīk bahâlarından zimmetinde bana ol mikdâr guruş deyni olduğunu ikrâr ü i‘tirâf dahi etmiş idi deyü ba‘de’d-da‘vâ ve’l-inkâr müdde‘î-i mezbûr el-Hâc Hüseyin ber-vech-i muharrer müdde‘âsını isbâtdan izhâr-ı acz edip talebiyle mezbûr Süleyman’a muvâcehesinde vech-i şer‘î üzere yemîn verilmeğin mûcebiyle müdde‘î-i mezbûr el-Hâc Hüseyin husûs-ı mezkûr için mezbûr Süleyman bilâ-beyyine-i âdile bî-vech mu‘ârazadan men‘ olunduğu huzûr-ı âlîlerine i‘lâm olundu. Fî-gurreti Saferi’l-hayr sene 1172.