Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 394 Hüküm no: 497 Orijinal metin no: [101a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ustoyan v. Peryo ile Kostantin v. Dimitri’nin birbirleri aleyhindeki alacak iddialarında anlaşma sağlanması Ma‘rûz, Arzuhâl eden Ustoyan v. Peryo zimmî mahfil-i şer‘iyyâtda derûn-ı arzuhâlde mezkûrü’l-ism Kostantin v. Dimitri muvâcehesinde mezbûr Kostantin zimmîye bundan akdem malımdan bi-tarîkı’l-emâne dokuz aded bıçaklı altın vermiş idim. Hâlâ taleb ederim deyü da‘vâ ve mezbûr Kostantin dahi müdde‘î-i mezbûr Ustoyan zimmetinde beynimizde ma‘lûm çubuk bahâsından altı guruş alacağım olmağla hâlâ taleb ederim deyü da‘vâ etdikde her biri âharın müdde‘âsını inkâr etmekle beynlerinde ba‘de’l-münâza‘a mezbûr Ustoyan ber-vech-i muharrer tasaddî eylediği dokuz aded bıçaklı altın da‘vâsına ve târîh-i i‘lâma gelince sâire müte‘allika âmme-i da‘vâdan merkūm Kostantin zimmînin zimmetini meccânen ibrâ ve iskāt edip merkūm Kostantin dahi vech-i muharrer üzere tasaddî eylediği altı guruşa ve târîh-i i‘lâma gelince sâire müte‘allika âmme-i da‘vâdan kezâlik merkūm Ustoyan’ın zimmetini ibrâ ve iskāt etmekle her biri âharın ibrâsını tasdîk ve kabûl etmeğin kat‘-ı nizâ‘ etdikleri huzûr-ı âlîlerine i‘lâm olundu. Fî 3 Safer sene 1172.