Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 395 Hüküm no: 498 Orijinal metin no: [101a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ustoyan v. Peryo’nun İlya v. Yorgo aleyhindeki alacak iddiasında anlaşma sağlanması Ma‘rûz, Derûn-ı arzuhâlde mezkûrü’l-ism Ustoyan v. Peryo zimmî mahfil-i şer‘iyyâtda arzuhâl eden İlya v. Yorgo zimmî muvâcehesinde mezbûr İlya zimmetinde beynimizde ma‘lûm eşyâ bahâsından yüz elli guruş hakkım olmağla hâlâ taleb ederim deyü da‘vâ etdikde mezbûr İlya zimmî dahi merkūm Ustoyan’ın müdde‘âsını inkârından mâ‘adâ bâ-temessük cihet-i karzdan mezbûr Ustoyan zimmetinde benim dahi yüz elli guruş hakkım olmağla taleb ederim deyü da‘vâ etdikde, ol dahi inkâr etmekle beynlerinde ba‘de’l-münâza‘a müdde‘î-i mezbûr Ustoyan zimmî da‘vâ-yı mezkûresinden merkūm İlya zimmî ile bâ-vesâtet-i muslihîn üç guruş bedel-i makbûza sulh olup mâ‘adâsına ve târîh-i i‘lâma gelince sâire müte‘allika âmme-i da‘vâdan mezbûr İlya’nın zimmetini ibrâ ve iskāt edip merkūm İlya dahi medfû‘u olan bedel-i sulh-ı mezbûr üç guruş ve târîh-i i‘lâma gelince sâire müte‘allika âmme-i da‘vâdan merkūm Ustoyan’ın zimmetini ibrâ ve iskāt etmekle her biri âharın ibrâsını tasdîk ve kabûl etmeğin kat‘-ı nizâ‘ etdikleri huzûr-ı âlîlerine i‘lâm olundu. Fî 3 Safer sene 1172.