Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 405 Hüküm no: 513 Orijinal metin no: [104b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Abdullah’ın varislerinin ırsen sahibi oldukları vakıf Frenkhanenin kiracılarının tahliyesi Bâ-mühr-i efendi, Ma‘rûz, İstanbul’da Bahçekapısı kurbünde Çelebioğlu mahallesinde sâkine ve zikri âtî kârgir vakıf Frenkhâne’ye mutasarrıf iken bundan akdem vefat eden el-Hâc Abdullah b. Ali b. İbrahim’in sulbî kebîr veledleri arzuhâl sâhibleri el-Hâc Halil ve zâtı mu‘arrefe olan Fâtıma Hatun meclis-i şer‘-i münîrde hâlik Corci v. Esbetar v. Yuvan’ın sulbî kebîr oğulları olup zikr olunan Frenkhâne’de mütemekkinler İknados ve Kostantin zimmîler muvâcehelerinde işbu mesfûrân İknados ve Kostantin’in babaları hâlik-i mesfûr Corci hayatında bin yüz kırk dört senesi Şevvâli gurresinden Vezîriazâm-ı esbak Yusuf Paşa Vakfı’ndan olup bi’l-icâreteyn tasarrufunda olan Galata’da Kemeraltı’nda vâki‘ bir tarafdan kilise ve bir tarafdan bostan ve bir tarafdan Zafiraki menzili ve bir tarafdan tarîk-i âm ile mahdûd kârgir vakıf Frenkhâneyi beş bin guruş bedel-i makbûz mukābelesinde ma‘rifet-i mütevellî ile babamız müteveffâ-yı mezbûr el-Hâc Abdullah’a kat‘an ferâğ ve tefvîz, ol dahi ba‘de’l-kabz ve’l-kabûl Frenkhâne-i mezkûrda mesfûr Corci babamız merkūm el-Hâc Abdullah tarafından müşâhereten bi’l-icâre hayatında mütemekkin iken babamız mezbûr el-Hâc Abdullah bin yüz altmış üç senesinde fevt, ba‘dehu mesfûr Corci hâlik olmağla mersûmun oğulları mesfûrân dahi üç seneden beri ber-vech-i muharrer müşâhereten bizim tarafımızdan bi’l-icâre mütemekkinler olmalarıyla işbu târîh-i i‘lâm-ı şehrî olan Saferi’l-hayr hitâmında fesh-i akd-i icâre edip Frenkhâne-i mezkûreyi tahliye ve şehr-i âtî Rebî‘ülevvel gurresinde bize teslîme mesfûrân İknados ve Kostantin zimmîlere tenbîh olunmak murâdımızdır deyü vakf-ı mezbûrun bi’l-fi‘il mütevellîsi Yusuf Ağa b. Abdullah hâzır iken da‘vâ etdiklerinde yedlerinde olup ibrâz etdikleri mütevellî-i vakıf temessükü takrîr-i meşrûhlarını nâtık ve mütevellî-i mezbûr dahi mazmûnunu tasdîk edip mesfûrân İknados ve Kostantin zimmîler cevâblarında zikr olunan Frenkhâne-i mahdûde-i mezkûreyi sâlifü’z-zikr kırk dört senesi Şevvâli gurresinde babaları hâlik-i mesfûr Corci hayatında müdde‘iyân-ı [105a] mezbûrânın babaları müteveffâ-yı mezbûr el-Hâc Abdullah’a üç bin guruş bedel-i makbûz mukābelesinde bâ-ma‘rifet-i mütevellî rızâsıyla ferâğ ve tefvîz, ol dahi hayatında ber-vech-i muharrer tefevvüz ve kabûl ve temessükde dahi kat‘î tahrîr olunup lâkin ferâğ-ı mezkûr babamız mersûm Corci meblağ-ı merkūm üç bin guruşu her ne zamân mezbûr el-Hâc Abdullah’a edâ ederse Frenkhâne-i mezkûreyi re’y-i mütevellî ile yine mesfûr Corci’ye ferâğ ve red etmek şartı ile olup merkūm Corci meblağ-ı mezkûru mezbûr el-Hâc Abdullah’a kable’l-edâ târîh-i i‘lâmdan iki sene mukaddem hâlik olmağın şart-ı mezkûr ile olan akdin fesâdına binâen meblağ-ı mezkûr üç bin guruşu hâlâ biz mezbûrân el-Hâc Halil ve Fâtıma’ya edâ edelim, Frenkhâne-i mezkûreyi bâ-re’y-i mütevellî bize ferâğ ve red eylesinler deyü tasaddî eyledikleri şart da‘vâları müdde‘iyân-ı mezbûrân münkirler ve mesfûr Corci hayatında İstendil’de mütemekkin olmağla her iki üç senede bir İstanbul’a gelip mezbûr el-Hâc Abdullah ile görüşüp ber-minvâl-i muharrer şart vukū‘u da‘vâsını etmeyip yirmi beş sene bilâ-gadr sükût ve terk-i da‘vâ eylediğini ve ber-minvâl-i muharrer müşâhereten mütemekkin olduklarını her biri mukırr u mu‘terif oldukdan sonra mesfûr Kostantin ihtifâ etmeğin mesfûr İknados ber-vech-i muharrer şart vukū‘u da‘vâsıyla mezbûrâna bî-vech mu‘ârazadan men‘ ve Frenkhâne-i mezkûreyi işbu Saferi’l-hayrı hitâmında tahliye ve şehr-i âtî Rebî‘ülevvel gurresinde müdde‘iyân-ı mezbûrân el-Hâc Halil ve Fâtıma’ya teslîme tenbîh olunduğu huzûr-ı âlîlerine i‘lâm olundu. Fî 4 Saferi’l-hayr sene 1172